Эрүүл мэндийн яам Дэлхийн эрүүл мэндийн байгууллага хамтран “Усны аюулгүй байдлын төлөвлөгөө” сургагч багш бэлтгэх сургалтыг энэ сарын 6-11-ны өдрүүдэд ЭМЯ дээр зохион байгуулж байна.

  Тус сургалтаар хот болон жижиг суурин газарт “Усны аюулгүй байдлын төлөвлөгөө”-г боловсруулах, хэрэгжүүлэх хүрээнд мэргэжилтний чадавхийг сайжруулах, сургагч багш бэлтгэх зорилготой бөгөөд сургалтыг 2 үе шаттайгаар сургалтыг зохион байгуулж байгаа юм.

  Манай улсад 2012 оноос эхлэн ДЭМБ-ын дэмжлэгтэйгээр Улаанбаатар хотын төвлөрсөн ус хангамжийн системд усны аюулгүй байдлын төлөвлөгөөг боловсруулах төслийг хэрэгжүүлж ирсэн бөгөөд “Усны аюулгүй байдлын төлөвлөгөө” хэмээх энэхүү шинэ ойлголтыг түгээх, сурталчилах чиглэлээр гарын авлагыг орчуулан хэвлүүлсэн байна.

  Мөн ус хангамж, нийгмийн эрүүл мэндийн мэргэжилтнүүдэд 2-3 удаагийн сургалт семинарыг зохион байгуулж, оролцогч талуудад усны аюулгүй байдлын талаар ойлголт өгөх, хамтын хүчин чармайлтыг нэмэгдүүлэх ажлуудыг хийж, улмаар усны аюулгүй байдлын төлөвлөгөөний алсын хараа, стратеги зорилт, үйл ажиллагааны чиглэлийг тодорхойлоод байгаа аж.

  Сургалтад БОНХЯ, БХБЯ, МХЕГ, НМХГ, УСУГ, Усны үндэсний хороо, НЭМҮТ, ЭМШУИС, ШУТИС, НҮБ-ын Хүүхдийн Сан, Дэлхийн зөн олон улсын байгууллага, ШУА-ийн Гео-Экологийн хүрээлэн, “Монголын нийтийн аж ахуйн үйлчилгээний холбоо” ТББ болон Дорноговь, Говь-Алтай, Баянхонгор, Өмнөговь, Хөвсгөл, Архангай зэрэг 6 аймгийн 6 сумын нийт 80 гаруй мэргэжилтнүүд хамрагдаж байна.