Өнөөдөр \2025.05.19\ Монгол Улсын Шадар сайд С.Амарсайхан Стандарчилал, техникийн зохицуулалт, тохирлын үнэлгээний итгэмжлэлийн тухай хуулийн шинэчилсэн найруулгын төслийг Монгол Улсын Их Хурлын дарга Д.Амарбаясгаланд өргөн барилаа.
Улсын хөгжил, эдийн засгийн өсөлт, хүний эрхийг стандартгүйгээр ярих, хангах, хэрэгжүүлэх боломжгүй, Стандарт бол хөгжлийн суурь юм. Гэтэл бидний одоогийн хүчин төгөлдөр мөрдөгдөж буй хууль тогтоомжид стандартыг боловсруулах, хэрэгжүүлэх, мөрдүүлэх, хяналт тавих талуудын харилцаа, хариуцлагын механизм дутмаг, ойлголтын зөрүү их байна. Монгол Улсын хэмжээнд 6730 стандарт мөрдөгдөж байгаагаас дөнгөж 44.8 хувь нь олон улсын түвшинд хүрсэн, үлдсэн нь шаардлага хангадаггүй. Стандарт мөрдөгдөхгүйгээс болж хүний эрүүл, аюулгүй орчинд амьдрах эрх зөрчигдөж, хүрээлэн буй орчин, бүтээгдэхүүний аюулгүй байдал алдагдах болов.
Монгол улсын хөгжлийн суурь болсон Стандартчилал, техникийн зохицуулалт, тохирлын үнэлгээний итгэмжлэлийн тухай хуульд нэмэлт өөрчлөлт оруулах зайлшгүй шаардлага үүсэж, хуулийн шинэчилсэн найруулгын төслийг 2022 оноос хойш боловсруулж холбогдох яамдаас 2 удаа албан ёсоор санал авч, Үндэсний хэмжээнд нэгдсэн хэлэлцүүлэг 3 удаа, салбарын хэмжээнд 60 удаа хэлэлцүүлэг зохион байгуулж, давхардсан тоогоор нийт 17,000 мянга гаруй оролцогчийг хамруулж, саналыг тусгасан.
Хуулийн төсөл 8 бүлэг, 36 зүйлтэй ба иргэн, аж ахуйн нэгж, байгууллага стандартчиллын баримт бичгийг сонгон хэрэглэх зохицуулалтыг өөрчилж, стандартыг иргэн, хуулийн этгээд дагаж мөрдөхөөр заасан. Стандартаар дамжуулан салбарын үйл ажиллагаанд хяналт тавих тогтолцоог бий болгоход хуулийн төслийн гол үзэл баримтлал чиглэж байна.
Хуулийн төсөл батлагдсанаар стандартыг хэрэглэх, хэрэгжүүлэх тогтолцоо боловсронгуй болж, олон улсын нийтлэг жишигт нийцсэнээр дотоодын бүтээгдэхүүн, үйлчилгээний чанар, стандартыг олон улсад зөвшөөрөх, гадаад худалдаа, экспортыг хөнгөвчлөх нөхцөл сайжирна. Түүнчлэн стандартын хэрэгжилт хангагдаж, хүн амын эрүүл, аюулгүй орчинд амьдрах эрх хангагдана гэж хуулийн төсөл боловсруулах ажлын хэсэг онцолж байна.
