Хамгаалагч, жижүүргүй орон сууцуудаар зарим нэгэн нийтлэг хэргүүд гарч байгаа аж. Тодруулбал, Баянгол дүүргийн V хорооны нутаг дэвсгэрт 101 дүгээр байрны оршин суугчийг гэртээ байхад нь үл таних хоёр этгээд пивоны хагархай шилээр айлган сүрдүүлж дээрэмдсэн хэрэг гарчээ. Иргэн Б-г гэртээ ганцаараа байх үед хаалганых нь хонх дуугарсан аж. Тэрээр гэр бүлийнхнийхээ хэн нэгнийг гэж бодоод хаалгаа нээчихэж. Гэтэл өмнө нь огт зүс үзээгүй хоёр залуу зогсч байсан бөгөөд тэд гартаа пивоны хагархай шил барьчихаад шууд сүрдүүлж эхэлжээ. Ингээд Б-гийн  гэрээс богино савхин куртик, “Жи мобайл”-ийн гар утас зэрэг эд зүйлсийг нь хулгайлаад зугтжээ. Азаар хохирогч гэмтэж бэртээгүй аж.  Хэргийн мөрөөр цагдаагийн байгууллага шуурхай ажиллаж, гэмт этгээдүүдийг илрүүлэн баривчилжээ. Энэхүү дээрмийн хэргийг Дархан-Уул аймгийн харьяат Э гэгч нь бусадтай бүлэглэн үйлдсэн байна.  Хэргийг Баянгол дүүргийн цагдаагийн хэлтэс шалгаж байна. Ямартаа ч орон сууцанд амьдардаг айлууд аюулгүй байдлаа хангадаггүйгээс ийнхүү гэмт этгээдүүдийн халдлагад өртдөг тохиолдол олон гарч байгаа гэж Цагдаагийн байгууллагаас анхааруулсан юм.