Говь-Алтай аймгийн Цээл сумын нутагт орших “Алтайн Хүдэр” компанийн Таяннуурын уурхайн хариуцлагагүй үйл ажиллагаанаас болж байгаль орчинд их хэмжээний хохирол учирч байгаа тухай мэдээлэл гарч, холбогдох удирдлага, яаманд мэдэгдээд байсан. Тэгвэл саяхан Алтайнхүдэр компаний Таяннуурын уурхайн ажилчид сумын иргэдийн гар утсыг хураан авч, тус уурхайн үйл ажиллагааг сурвалжлахаар очсон Монгол телевизийн камерыг хураасан байна. Учир нь энэ оны гуравдугаар сарын 12-14-ний өдрүүдэд "Шинэ зууны цээл" ТББ болон БОНХ-ийн яам, МХГ, Цагдаагийн газар, нутгийн зөвлөлийн хамтарсан шалгалтыг Алтайнхүдэр компанийн Таяннуурын уурхай дээр хийсэн байна. Холбогдох албаныхан шалгалт хийхээр очиход  "Алтайн Хүдэр" компанийн ажилчид "Шинэ зууны цээл" ТББ-ын тэргүүний гар утсыг Монгол телевизийн камерын хамтаар хураан авч телевизийн камерыг цагдаагийн байгууллагад харин гар утсыг нь өөрсдөдөө хадгалж авч үлджээ.

"Шинэ зууны  цээл" ТББ, БОНХ-ийн яам, МХГ, Цагдаагийн газрын хамтарсан шалгалт нь эртнээс "Алтайн Хүдэр" компанийг унагах гэж бэлтгэсэн шалгалт байсан. Тиймээс маш олон ноцтой баримтуудыг хадгалсан Шинэ зууны цээл ТББ-ын тэргүүний гар утсыг авчүлдсэн гэж компанийн зүгээс ярьж байна. Тус компанийнхан ярихдаа "Шинэ зууны цээл" төрийн бус байгууллагын тэргүүний гар утас руу бичсэн мессежүүдийг харахад энэхүү шалгалт нь зохион байгуулалттай шалгалтын комиссын дүгнэлтэд маш олон улс төрчид нөлөөлсөн байна" гэсэн юм. "Алтайн Хүдэр" компанийг шалгасан уг хэрэгт Хууль зүйн сайд Тэмүүжин, БОНХ-ийн яамны төрийн нарийн бичгийн дарга Батболд, Ерөнхийлөгчийн байгаль орчны зөвлөх Зоригт зэрэг хүмүүс зохион байгуулалттай оролцсон гэх нотлох баримтууд байна гэж Алтайн Хүдэр компанийн зүгээс мэдэгдээд байна.