Ерөнхийлөгчийн сонгуульд өрсөлдөх улс төрийн хоёр гол намын нэр дэвшигчид тодроод байна. АН-ын нэр дэвшигч Ц.Элбэгдорж, МАН-ын нэр дэвшигч Б.Бат-Эрдэнийн хэн нь хэн бэ гэдгийг монголчууд мэднэ. Харин ямар хөрөнгө, орлоготой вэ гээг сонин. Энэ жилийн Ерөнхийлөгчийн сонгуульд нэр дэвшигчид ийм хөрөнгөтэй.

                            Б.Бат-Эрдэнэ 4000 малтай бол Ц.Элбэгдорж 333 малтай

    УИХ-ын гишүүн Б.Бат-Эрдэнэ өнгөрсөн жил хамгийн олон буюу 3000 гаруй малтай гишүүнээр тодорч байсан. Энэ жил ч түүний буянт сүргийн тоо толгой нэмэгдэж 4000 дөхжээ. Тэрбээр хөрөнгө орлогын мэдүүлэгтээ адуу 400, хурдан удмын адуу 20, үхэр 60, хонь 3000, ямаа 350, нийт 3830 мал бий гэжээ. Тэдний ихэнхи нь улсын наадамд түрүү авахад нь ард олны бэлэглэсэн мал бөгөөд өдий олон жил өсч үржсээр ийм тоонд хүрсэн байна. Тэгвэл Ерөнхийлөгч Ц.Элбэгдорж үхэр 3, хонь 20, адуу 25, ямаа 15-тай гэсэн байна.

                                                          Ерөнхийлөгчийн орлого долоо дахин өссөн нь

   Ерөнхийлөгч Ц.Элбэгдоржийн хөрөнгө орлого өмнөх жилээс долоо дахин нэмэгдсэн байна. Тэрбээр жилийн 11 сая 846  мянган төгрөгийн орлоготой аж. Түүний нэр дээр “Муштааг” ХХК, “Анх-Эрдэнэ” ХХК, “Либерти” дээд сургууль бусад, “АСУ” ХХК, “Женко тур бюро” ХК, “Ремикон” ХК зэрэг зургаан компаний хувьцаа байдаг аж. Харин Б.Бат-Эрдэнэ гишүүний хувьд 25 сая 597 мянган төгрөгийн орлоготой юм байна. “Буудайн цацал” ХК “Атар Чандгана” ХК, “Атар Чандгана Сүү” ХХК, “Эрдэнэс таван толгой” ХК-ны хувьцаатай аж.
Харин тэдэнд нийтлэг байгаа зүйл нь хоёулаа ямар ч банкны өр зээлгүй, мөн авлагагүй юм.

                                         Ц.Элбэгдорж хувийн машингүй бол Б.Бат-Эрдэнэ хоёр жийп хөлөглөдөг
    Төрийн өндөр албан тушаалтнуудыг унаа, машинаар хангадаг тул Ерөнхийлөгч Ц.Элбэгдоржид өөрийн гэсэн унаатай байх шаардлагагүй бололтой. Түүний нэр дээр нэг ч машин байдаггүй аж. Мэдээж гэр бүлийнхэн нь янз бүрийн унаа хөлөглөж л байгаа. Б.Бат-Эрдэнэ гишүүний хувьд “Suzuki Grand Vitara”, “Lexus 470” гэсэн хоёр жийп унадаг. Нэр дэвшигч Ц.Элбэгдорж хорь гаруй хүүхэдтэй ч 418911.00 мянган төгрөгийн өртөгтэй нэг л байртай. Харин Б.Бат-Эрдэнийх гурван охинтой бөгөөд 502100.00 мянгаар үнэлэгдсэн хоёр орон сууцтай юм байна.