Улаанбаатар хотноо өнгөрсөн бямба гарагт эхэлсэн Чөлөөт бөхийн “Mongolia Open-2013” олон улсын тэмцээний үеэр Монголын Чөлөөт бөхийн холбооны зүтгэлтнүүдэд гадаадын улс орнуудаас шагнал гардууллаа.

Монгол, БНХАУ-ын Өвөрмонголын өөртөө засах орны хооронд чөлөөт бөхийн спортын олон жилийн уламжлалт харилцааг хөгжүүлэхэд их хувь нэмэр оруулж байгаа монголын чөлөөт бөхийн спортын зарим зүтгэлтнийг шагнасан юм. Тухайлбал, МЧБХ-ны шинэ ерөнхийлөгч, Азийн бөхийн холбооны Удирдах зөвлөлийн гишүүн, японы мэргэжлийн сумо бөхийн Их аварга Д.Дагвадорж, тэргүүн дэд ерөнхийлөгч, Улсын аварга, Хөрөнгө оруулалтын банкны төлөөлөн удирдах зөвлөлийн дарга, УИХ-ын гишүүн Д.Сумьяабазар,  гавьяат тамирчин Б.Болд, дэд ерөнхийлөгч, “Женко” группийн ерөнхийлөгч, Сайн санааны тоглолтын аварга, ОУХМ Х.Баттуул, "Алдар" спорт хорооны дарга, даян аварга, гавьяат тамирчин Г.Өсөхбаяр нарыг БНХАУ-ын ӨМӨЗО-ы бөхийн холбооноос “Дэлхийн нуруунд тохсон дээдсийн алтан эмээл” гэсэн үгс бүхий дурсгалын алтан эмээлээр шагнасныг ӨМӨЗО-ы бөхийн холбооны ахлах дасгалжуулагч, Ази тивийн аварга шалгаруулах тэмцээний мөнгөн медальт Батмөнх, Азийн аварга шалгаруулах тэмцээний хүрэл медальт Алтан-очир нар гардуулав. Мөн Монгол, Болгар улс хоорондын чөлөөт бөхийн спортын харилцааг хөгжүүлэхэд оруулж байгаа хувь нэмрийг нь үнэлж Болгарын бөхийн холбооны ерөнхийлөгч, дэлхийн долоон удаагийн аварга, олимпийн аварга В.Иорданов МЧБХ-ны шинэ ерөнхийлөгч Д.Дагвадоржийг дурсгалын зүйлээр шагнасныг тус тэмцээнд оролцож байгаа Болгарын бөхийн төлөөлөгчид түүнд хүндэтгэлтэйгээр гардуулж баяр хүргэсэн юм.