“Үндэсний түргэн тусламжийн сүлжээ” үндэсний хөтөлбөрийн дунд хугацааны үнэлгээний дүнг ЭМЯ-ны Удирдлагын зөвлөл хэлэлцжээ. Тус зөвлөл түргэн тусламжийн хөтөлбөрийн анхын шатны хэрэгжилт хангалтггүй байна гэж дүгнэсэн байна.

  Яаралтай дуудлага хүлээж аваад 20 минутын дотор тусламж үзүүлсэн тохиолдлын хувь 2013 оны эхний 3 сарын байдлаар 34.8 хувьтай байгаа нь 2010 оны суурь үзүүлэлтээс (23.8) өссөн дүнтэй байна. Энэ нь түргэн тусламжийн хоёр салбарыг нээж, төвлөрлийг сааруулж, түргэн тусламжийн автомашины бааз шинэчлэл хийгдэж байгаатай холбон үзэж болно. Гэвч 20 минутын дотор очиж тусламж, үйлчилгээ үзүүлж чадахгүй, хүлээгдэл байсаар байна.

  Осол, гэмтлийн дуудлагад эмч очихоос өмнө нас барсан тохиолдлын хувь 2012 оны жилийн эцсийн байдлаар 2.5 хувьтай байгаа нь 2013 онд хүрэх түвшинд (2.8) хүрсэн үзүүлэлттэй байна.

    Түргэн тусламжийн тогтолцоог боловсронгуй болгож, Үндэсний түргэн тусламжийн сүлжээ байгуулах зорилтын хүрээнд Эрүүл мэндийн сайдын тушаалаар Эрүүл мэндийн газрын дэргэд 14 хүний орон тоотой Түргэн тусламжийн үндэсний сүлжээний төвийг анх байгуулж, Эрүүл мэндийн хөгжлийн төвийн бүтцэд Эмнэлгийн яаралтай, түргэн тусламжийн сүлжээний зохицуулалтын алба нэртэй нэгж байгуулсан. Гэсэн ч чиг үүргийн биелэлт хангалтгүй түвшинд байна.

  Уг дүгнэлтэд, "2010 оны 12 дугаар сард Баянзүрх, 2011 онд Сонгинохайрхан дүүрэгт Нийслэлийн яаралтай тусламжийн төвийн салбарыг нээж, хүүхдийн түргэн тусламжийн үйлчилгээг нэгтгэсэн нь хүн амд үзүүлэх түргэн тусламжийн үйлчилгээг ойртуулах, төвлөрлийг сааруулах, тусламж, үйлчилгээ үзүүлэх хугацааг богиносгох, шуурхай байдлыг хангахад хувь нэмэр оруулжээ.

Гэвч түргэн тусламж үзүүлж байгаа эрүүл мэндийн байгууллагын чадавхийг сайжруулах, хүний нөөцийн чадавхжуулах, бэлтгэхэд ямар нэгэн төлөвлөлт байхгүй байна. Зөвхөн сургалтууд зохион байгуулах биш, хүний нөөцийн чадавхжуулах тогтолцоо бүрдүүлэхэд анхаарах шаардлагатай байна. Анагаах ухааны боловсрол олгох болон сувилахуйн сургалтын хөтөлбөрт тусгагдсан эмнэлгийн яаралтай тусламжийн хичээлийн цагийг нэмэгдүүлэх талаар тодорхой ажил хийж эхлээгүй байна. Мөн яаралтай тусламжийн мэргэшсэн ажилтан (парамедик) бэлтгэх эрх зүйн орчин бүрдүүлэх асуудалд анхаарах шаардлагатай байна" гэжээ.