Мөнгө угаасан хэргээр саатуулагдсан МИАТ-ын экс дарга нар болон энэ хэрэгт хамааралтай хүмүүсийг хуулийнхан шалгаж, мөрдөн байцаалт дуусаад байна. Өчигдөр тус хэргийг шүүхэд шилжүүлэхээр боллоо. Нэг хэсэгтээ улс төрчдийг доргиож “энэ хэргийн цаана хэн нэгэн улс төрч буй” гэх хардлагыг төрүүлээд байсан ч мөрдөн байцаалтын шатанд  тэд ямар ч улс төрчийг нэрлэсэнгүй. МИАТ-ын гүйцэтгэх захирал асан Ц.Орхон эхнэрийг нь суллавал мөнгө угаахад гар дүрсэн улс төрчид, томчуудыг нэрлэнэ гэж амласан тухай албан бус яриа дээрх хардлагыг улам өрдөж байв. Гэсэн ч Ц.Орхоны эхнэрийг буруутай гэж үзэх хангалттай нотолгоо байхгүй гэснээр түүний хэрэг хэрэгсэхгүй боллоо. Харин үүний цаана бас л мөнгө угаахыг нь нүдээ аниад өнгөрөөсөн эсвэл өөрсдөө оролцсон байх магадлалтай “нууц ноёнтон”-ууд байгаа гэх хардлага байсаар байна.

  Хамгийн анх МИАТ-ын гүйцэтгэх захирал асан Ч.Хоролсүрэнгийн байгуулсан “Монголиан Эй¬рлайнес” компанид хувь эзэмшдэг Н.Номтойбаяр гишүүн болон тус компанийг байгуулахад тууз хайчилсан Х.Баттулга сайд нарыг хэрэгт холбоотой байж магадгүй гэх яриа байсан ч ямарч нотолгоо гараагүй байна. МАН-ынхан, тэр тусмаа мөнгө угааж байсан тухайн үед хууль зүйн сайд байсан Ц.Нямдоржийг шалгах хэрэгтэж гэх цөөнгүй хүн байсан. Харин хэргийг шалгасан мөрдөн байцаагч нар МИАТ-ын дуулиант хэрэгт хэн нэгэн улс төрчийн оролцоо байхгүй гэсэн дүгнэлтэнд хүрсэн байна. Өөрөөр хэлбэл “дунд гарын” гэх Ц.Орхон нарын хүмүүс дарга нараасаа нууж мөнгө угаасан гэсэн үг.
   Х.Тэмүүжин сайд “энэ хэргийг улс төрчдийн нөлөөлөөс ангид байлгана” гэж хүчтэй дуугарснаар татварын мөнгө идсэн дарга нарын хэрэг нэг тийшээ шийдэгдэх нь.

   Гэлээ ч энэ хэрэгт холбогдсон хүмүүсийн нэг авууштай зүйл нь энэ эрхмүүд улсад учруулсан хохирлоо бүрэн төлж чадахаар бэлтэй хүмүүс аж. Тэд улсад нийт 9,3 тэрбум төгрөгийг гадаад дахь дансандаа шилжүүлэн хохирол учруулсан. Тэгвэл тэдний 16,5 тэрбум төгрөг бүхий хадгаламж, 27 компанид оруулсан хувь, машин гэх зэрэг бусад эд зүйлсийг хураан авч битүүмжилсэн байна. Тиймээс Ц.Орхон нарын хөрөнгийг зараад улсын хохирлыг бүрэн төлөх боломжтой. МИАТ-ын экс дарга нар олон жил татвар төлөгчдийн мөнгө угааж байсан нь баримттай гэдгийг Х.Тэмүүжин сайд удаа дараа өөрийн амаар хэлсэн. Олон нийтийн анхаарлын төвд байж шийдэгдэх ёстой гэдгийг ч хэлсэн. Тэгэхээр хариутай бол бариутай, олон хавар нэгэндээ гэдгийг ичихээ байсан дарга нарт сануулсан хэрэг болж байна.