Манай улс Малайз улсад өөрийн гэсэн Элчингүй билээ.  Одоогоор Малайз дахь монголчууд  Тайланд улс дахь Монголын Элчин сайд Ч. Баттөмөрт хандаж байгаа юм байна. Харин ирэх жилээс эхлэн Малайзад өөрийн гэсэн Элчин сайдыг томилох асуудлыг Засгийн газар хөөцөлдөж байгаа гэнэ. Учир нь Малайзад Монголын 1000 гаруй иргэн байдаг.  Үүнтэй холбоотой Гадаад харилцааны яамны Консулын газрын захирал Ш.Сүхбаатар Малайз улсад ажиллаад иржээ. Тэрээр хоёр орны харилцааны талаар ярилцаад зогсохгүй Ш.Алтантуяагийн хэргийн өмгөөлөгч Карпал Сингхтэй уулзаж хэргийг хуулийн хүрээнд шийдвэрлэх, талийгаачийн эцгийн гаргасан иргэний нэхэмжлэлийг хэлэлцэх асуудлыг түргэтгэх, өнчин үлдсэн хоёр хүүхдэд хүмүүнлэгийн тусламж хэрэгтэй байгаа болон талийгаачийн шарилын үлдэгдлийг авахад туслалцаа хүссэн байна. Өмгөөлөгч Карпал Сингх “Эрүүгийн хэргийн шүүх хурлын шийдвэрийг тухайн хэрэгт сэжигтнээр холбогдсон цагдаагийн хоёр офицер давж заалдсан тул хэргийг шийдвэрлэх ажиллагааг удааширч байгаа. Үүнтэй холбогдуулан С.Шаарийбуугийн гаргасан иргэний нэхэмжлэлийг шүүхээр хэлэлцэх боломжгүй хүлээгдэж байгаа тухай дурдаад талийгаачийн хоёр хүүхдэд тусламж үзүүлэх асуудлыг төрийн бус байгууллагаар дамжуулан тавих, шарилын үлдэгдлийг буцаах асуудлыг өмгөөлөгчийн хувьд өөрөө зохицуулж болно” хэмээн мэдэгдсэн талаар "Зууны мэдээ" сонины өнөөдрийн дугаарт гарчээ.

Ш.Алтантуяагийн хэрэгт холбоотой цагдаагийн хоёр ажилтны гомдлын дагуу давж заалдах шатны шүүх хурал зургадугаар сарын 10-нд эхэлж, гурван өдөр үргэлжилнэ.

Сирул Азар болон Азилах нар 2006 оны 10 дугаар сард 28 настай Ш.Алтантуяаг хөнөөсөн учир Шах Алам дээд шүүхийн 2009 оны тогтоолоор тэдэнд цаазаар авах ял шийтгэсэн юм. Гэмт хэргийн хамсаатан, улс төрийн шинжээч Абдул Разак Багиндаг эд мөрийн баримтгүйн улмаас хэрэг үүсгэн шалгаж чадаагүй юм.