МИАТ-ийн удирдлагуудын мөнгө угаасан гэх хэргийг Нийслэлийн шүүхээс харъяалал тогтоож,  Баянзүрх дүүргийн шүүхэд өнөөдөр шилжүүллээ. Ингэснээр хурлын тов 30 хоногийн дотор товлогдох юм.
Хэрэгт 2006-2011 оны хооронд МИАТ-ийн гүйцэтгэх захирлаар ажиллаж байсан Б.Бат-Эрдэнэ, Б.Эрдэнэбилэг, Ц.Орхон, дэд захирлаар ажиллаж байсан Ч.Хоролсүрэн, түүний дүү “Монголиан эйрлайнс” группын захирал асан Ч.Суурьтогтох, тэдний үүсгэн байгуулсан компанийн нягтлан бодогчоор ажиллаж байсан Н.Гантөмөр, 1997-2007 оны хооронд “Голомт” банкны зургаадугаар салбарын захирлаар ажиллаж байсан Г.Саранчимэг нарын долоон хүнийг буруутган шалгаж байгаа. Тэднийг Эрүүгийн хуулийн тусгай ангийн 150.3-т зааснаар бусдын эд хөрөнгийг завшиж үрэгдүүлсэн, 166.3-т зааснаар мөнгө угаасан гэх үндэслэлээр буруутган шүүх юм.
Харин “Голомт” банкны зургаадугаар салбарын захирал Г.Саранчимэгийн тухайд 156.3.3-т зааснаар банкны хууль тогтоомж зөрчсөн гэх зүйлчлэл нэмэгдэж байна.
Мөрдөн байцаалтын шатанд МИАТ-ийн дээрхи удирдлагууд нисэхийн даатгалын үйлчилгээ үзүүлдэг гэх Япон, Хонгконг дахь зохиомол хоёр ч компанийн дансаар тухайн үеийн ханшаар нийтдээ 9.3 тэрбум төгрөгийг шилжүүлсэн болох нь тогтоогджээ. Дээрх мөнгөнөөс өөрсдийнх нь хувийн данс болон компанийх нь дансаар нийтдээ 4.3 тэрбум төгрөг нь эргэж орж ирсэн болох нь тогтоогдсон байна. Хэрэгт холбогдсон хүмүүсийн 16.5 тэрбум төгрөгийн хадгаламжийн данс, 27 компанид оруулсан хувь, бусад машин хэрэгслийг битүүмжилжээ.