УИХ-ын гишүүн асан, Монгол Улсаас Кувейт улсад сууж байсан Онц бөгөөд Бүрэн эрхт Элчин сайд К.Сайрааныг эх орноосоо урвасан гэх үндэслэлээр ТЕГ шалгаж эхэлсэн талаар бид мэдээлсэн. Учир нь өнгөрсөн жил түүнийг Казахстаны нууц тагнуул байж болзошгүй хэмээн гадаадын хэвлэлийн мэдээллүүд бичиж байсан. Тухайн үед Кувейтэд Элчин сайд байсан тэрбээр энэ мэдээллийг няцааж, огт үндэслэлгүй хэмээн мэдэгдэж байв. Гэвч ТЕГ-аас түүнд Эрүүгийн хуулийн 79 дүгээр зүйл буюу “Эх орноосоо урвасан” гэсэн зүйлээр эрүүгийн хэрэг үүсгэн шалгаж эхэлснийг албаны эх сурвалж нотоллоо. Мөн энэ талаар ТЕГ-ын албаны эх сурвалжаас тодруулахад “К.Сайраан сайд бие нь тааруу. Гадаадад эмчилгээ хийлгэж байгаа. Тиймээс түүнийг шалгах асуудлыг түр түдгэлзүүлээд байна Гэсэн ч өнгөрсөн амралтын өдөр эх орондоо ирсэн тул шалгах ажиллагаа албан ёсоор эхлэх ёстой. Гэхдээ биеийн байдал нь муу байгаа учраас биеийн байдлыг нь харгалзан үзнэ” гэв.