Тавдугаар сарын 11-ий өдөр БЗД-ийн 11-р хороонд тавхан настай хүү харгис эцгийнхээ хурц мэсэнд өртөж хүнд гэмтсэн билээ. Тус хэрэг нийгэмд цочрол өгч хэвлэлээр дуулиан тарьсан. Хүүд туслах аян өнгөрсөн өдрүүдэд улс орон даяар өрнөж, харгис эцэгт нь тохирсон ялыг өгөх ёстой гэсэн шүүмжлэл өрнөлөө. Тэгвэл өчигдөр хүүд туслах аяныг өрнүүлж буй “Лантуун дохио” бүлгэм, хүүгийн ээж, эл хэргийг ил болгосон дуудлагын эмч нар сэтгүүлчдэд мэдээлэл хийлээ. Тэд ярихдаа “Хүүгийн аавыг гарын ур сайтай, төмрөөр эд материал хийж мөнгө олдог байсан. Сүүлийн 2-3 жилийн хугацаанд архинд гүнзгий орж эхнэр хүүхдээ, харгисаар зоддог болсон. Олсон мөнгөө амьдралдаа биш архинд өгдөг болсон. Цаашлаад хүүхдүүдээ амьдралд сургаж, зөв хүмүүжүүлж байгаа гэсэн нэрийдлээр зодож, хүнд ажил хийлгэдэг байсан” гэж ярьсан юм. Тэд мөн хүүхдийн эцгийг олон жил хүнийг яргалсан гэдэг зүйл, заалтаар ял авах ёстой гэсэн юм. Тус хурлын үеэр бас нэгэн сонирхол татахаар зүйл яригдсан нь БЗД-ийн Засаг даргын орлогч Т.Баясах нарын хүмүүс “Хохирогч хүүг сувилалд хэвтүүлсэн”, “Тэднийг хамгаалалтад авсан” зэрэг өөрсдийн хийгээгүй ажлаа хийсэн болгож ярьсан" гэв. Тэд мөн туслахаар ажиллаж, тухайн айлын амьдралыг судалж гэр бүлийнхэнтэй нь уулзсан гэдэг нь худал гэсэн юм. Өнгөрсөн долоо хоногт БЗД-ийн Тамгын газрын ажилчин Т.Баясах нэгэн хэвлэлд ярилцлага өгөхдөө хүүд туслахаар ажиллаж байгаа болон, хүүхдүүдийг ээжтэй нь байлгах уу, тусгаарлах уу гэдэг дээр судалгаа хийж байгаа гэсэн зүйлийг ярьсан байсан.
Гэтэл хүүгийн ээж “Т.Баясах болон дүүргийн ажилчид нэг ч удаа надтай уулзаагүй байж бидэнд тусалж, уулзсан гэж ярьсанд гайхаж байна” хэмээн хэлсэн юм. Тэд яагаад хэвлэлээр худал ярив. Хүмүүсийн шүүмжлэлд өртөхгүйн тулд хийгээгүй ажлаа хийсэн болгож ярьсан уу. Ер нь дүүрэг, хорооныхон иргэдтэй хэр ойр ажилладаг вэ гэдэг эндээс харагдаж байгаа юм. Эл асуудалд ч олны бухимдлыг ихээхэн хүргээд авлаа.
Одоо хүү сувилалд эмчлүүлж байгаа бөгөөд бие нь сайжирч, сэтгэл санаа нь харьцангүй тайван болсон байна. Хүүгийн ээж О.Болормаа нөхрийгөө дахин ирэхээс айж байгаагаа хэлээд гомдолтой гэсэн юм.
24tsag.mn
