Монгол Улсаас Шведийн Вант Улсад суугаа ЭСЯ, Швед дэх Монголчуудын Үндэсний Холбоо хамтран “Швед дэх Монголчуудын өдөрлөг”-ийн ээлжит арга хэмжээг өнгөрсөн бямба гарагт Гётеборг хотод зохион байгуулав.

Өнгөрөгч оны 11 дүгээр сараас эхлэн сар бүр зохион байгуулж буй “Швед дэх Монголчуудын өдөрлөг”-ийн энэ удаагийн арга хэмжээний үеэр ЭСЯ-ны үйл ажиллагааны талаар танилцуулж, Монгол Улсын Ерөнхийлөгчийн 2013 оны сонгуульд хилийн чанадад байгаа монгол иргэд хэрхэн оролцох, ЭСЯ-наас үзүүлж буй консулын үйлчилгээнд хэрхэн хамрагдах талаар дэлгэрэнгүй мэдээлэл өгснөөс гадна Гётеборг xотод оршин суугаа Монголчуудад хэрхэн хөдөлмөр эрхлэх, нийгмийн халамжид хэрхэн хамрагдах талаар тус хотын оршин суугч Д.Бат-Амгалан болон Швед дэx Монголчууд Үнсдэний Холбооноос зөвлөгөө өгч, иргэдийн сонирхсон асуултад хариулт өгчээ. Түүнчлэн энэ үеэр Швед дэx Монголчууд Үнсдэний Холбооны зүгээс хийж буй ажлын талаараа танилцуулж, цаашид Стокгольм хотоос гадна Швед улсад ажиллаж, амьдарч буй нийт монголчуудад хэрхэн хүрч ажиллах, Холбооны үйл ажиллагааг хэрхэн өргөжүүлэх талаар санал солилцож, Гётеборг хотод тус холбооны салбарыг байгуулахаар болсныг тус хотын монгол иргэд идэвхтэй дэмжиж, талархан хүлээн авав. Мөн үеэр Гётеборг хот дахь монгол иргэдэд сайн дураараа тал бүрийн дэмжлэг, туслалцаа үзүүлж, эрх ашгийг нь хамгаалахад олон жил сэтгэл зүтгэл гаргаж ирсэн хотын оршин суугч Д.Бат-Амгаланг Монголын Залуучуудын Холбооны “Хөдөлмөрийн алдар” медалиар шагнав. Швед улсын 2 дахь том хот болох Гётеборг-д 120 гаруй монгол иргэн оршин суудаг бөгөөд “Швед дэх Монголчуудын өдөрлөг”-ийг анх удаа Стокгольм хотоос өөр газарт зохион байгуулснаараа энэ удаагийн арга хэмжээ онцлогтой байлаа хэмээн Шведийн Вант Улсад суугаа ЭСЯ мэдээллээ.