Энэ жилийн элсэлтийн ерөнхий шалгалт явагдахад сар хүрэхгүй хугацаа үлдээд байна. Үүнтэй холбоотойгоор шалгуулагчдад шалгалтаа амжилттай гүйцэтгэхэд нь  туслах зорилгоор БШУЯ-ны дэргэдэх Боловсролын үнэл¬гээний төв (БҮТ)-өөс дараахь зөвлөгөөг гаргажээ.

Шалгалтын эхний өдөр шалгуулагч бүхэн ширээн дээр байрлах гэрээний хуудсыг уншиж танил¬цаад, гарын үсгээ зурах юм байна. Хэрэв таны зураг, регистрийн дугаар, овог, нэр буруу, зөрүүтэй гэх мэт зөрчил байвал гэрээний хуудсан дээр засах буюу заалан дахь хянагч багшид тухайн үед  мэдэгдэж протоколд тэмдэг¬лүүлэх хэрэгтэй гэнэ. Харин хонх дуугарч, шалгалтын товлосон цаг тоолж эхэлснээс хойш математик, хими, физикийн хичээлүүдийн шалгалтыг 100 минутад, монгол хэл, англи хэл, орос хэл, Монголын түүх, нийгмийн тухай мэдлэг, газар зүй, биологийн хичээлүүдийн шалгалтыг 80 минутад  багтааж даалгавраа гүйцэтгэн, хариултын хуудсыг бөглөнө. Шалгалтын заасан хугацаа дуусч, хонх дуугармагц та бүхний хийсэн ажилд баганан код наалган хурааж авах нь.
Харин хариултын хуудсыг хар, хөх өнгийн үзгэн болон тосон балаар бөглөнө. Зөвхөн хариултын хуудсан дээр хэрхэн хийсэн байдлаар шалгалтын үнэлгээг өгөх учраас шалгуулагчид нямбай ажиллах хэрэгтэйг сануулж байна. Хэрэв та хариултын хуудсан дээр зааснаас өөр тэмдэглэгээ хийх, нэг мөрөнд давхар тэмдэглэгээ хийсэн тохиолдолд тухайн даалгаврын хариулт хүчингүй болно гэсэн шүү. Энэ үеэр шалгалтын танхимд ноорог цаас ч оруулахгүй гэдгийг зохион байгуулагчид анхаарууллаа. Тухайн өдөр шалгалтын заал, танхимд цүнх, гар утас, тооны машин, таблиц, томьёоны хураангуй, ном, дэвтэр, ноорог цаас зэрэг зүйл авч орсон бол хураалгах ёстой аж. Мөн шалгуулагчид даалгавар гүйцэтгэж байх үедээ хоорондоо ярих, эргэж харах, үзэг харандаа дамжуулах, дохио зангаа хэрэглэх зэрэг үйлдэл гаргаж бусаддаа саад болохыг хатуу хоригложээ. Их, дээд сургуульд шинээр элсэгч та дээрх үйлдлүүдийг хийвэл,  шалгалтын заалнаас гаргах болно гэдгийг анхаарна уу.  Түүнчлэн шалгалт эхлэх хонх дуугарснаас хойш шалгуулагчид хянагч багшаас шалгалтын сэдэвтэй холбоотой ямарваа нэгэн асуулт асууж, тайлбар авах нь бүр ч хориотой гэв. Мэдээж өмнөх онуудын жишгээр шалгалтын материал тарааснаас хойш  танхимд хүн орж, гарахгүй нь.
Биеийн эрүүл мэндийн байдлаас болон бусад шалтгаанаар шалгалтын танхимаас гарсан хүний гарах хүртлээ хийсэн ажлыг дүгнэж зохих оноог өгөхөө БҮТ-ийнхөн мэдэгдлээ. Гол нь шалгалтын дэвтэр болон хариултын хуудсан дээрх хувилбараа тулган сурагч бүр өөрийн гараар гэрээний хуудасны хувилбар тавих зайд гаргацтай, үнэн зөв, тод бичих шаардлагатай аж. Харин шалгалтын хугацаа дуусахад та дугтуйнаас хос баганан кодын нэг хувийг нь  хариултын хуудсан дээрх баганан код наах хэсэгт, нөгөө хувийг нь гэрээний хуудасны баганан код наах хэсэгт наана. Шалгуулагчид шалгалтын заалнаас ууттай материалыг битүүмжлэн, хүлээлгэн өгөхөөр хянагч багш, шалгуулагчийн төлөөлөгчид явсны дараа танхимаас гарах гэнэ. Ингэхдээ шалгалтын дэвтрээ гэртээ авч харьж болох юм байна. Хэрэв хянагч багшийн талаар шалгуулагчдаас гомдол санал байвал  төлөөлөгчдийн ахлагчид бичгээр уламжилж шийдвэрлүүлэх эрх нь нээлттэй  гэнэ.