Эрүүл мэндийн яамны Санхүү хөрөнгө оруулалтын газрын дарга болон Төрийн нарийн бичгийн даргаар ажиллаж байсан Н.Түмэндэмбэл нь тус яамнаас зарласан эмнэлгийн тоног төхөөрөмж нийлүүлэх тендерүүдийг шалгаруулахдаа өөрийн эзэмшлийн “Лабтех” ХХК-ийг хууль бусаар шалгаруулж хуурамч бичиг баримт үйлдэж, капитал засвар хийсэн хуучин тоног төхөөрөмж нийлүүлж улсын төсвийн хөрөнгийг онц их хэмжээгээр завшсан эрүүгийн хэрэгт УМБГ-т мөрдөн байцаалтын ажиллагаа явуулж байна. Хэргийг шалгах явцад “Лабтех” ХХК нь ЭМЯ-нд явуулийн 3 эмнэлэг нийлүүлэх тендерт мөн хууль бусаар шалгарч, чанар муутай, хөдөө орон нутагт явж ажиллах техникийн шаардлага хангахгүй бүтээгдэхүүн нийлүүлж онц их хэмжээний хохирол учруулсан хэргийг нэгтгэн шалгаж байгаа аж. Энэ хэрэгт Т, О, Т, Б, Г, Б нарын зургаан хүнийг сэжигтнээр тооцон шалгаж байгаа талаар Цагдаагийн газраас мэдээллээ.

“ЛАБТЕХ” ХХК нь гэрээгээр хүлээсэн үүргээ биелүүлээгүй байхдаа бүх санхүүжилтийг авсан, мөн тоног төхөөрөмж нийлүүлэх ажпыг “Саммитмедикал сервис” ХХК-иар гүйцэтгүүлсэн, гэрээг хавсран гүйцэтгэгчээр оролцсон Саммит медикал сервис ХХК нь “имрайн” шинэ аппарат оруулж ирэлгүй хуучин аппарат хилээр оруулж ирэн их хэмжээний мөнгө завшин улсад онц их хэмжээний хохирол учруулсан хэмээгдэж байгаа юм.

Мөн “Лабтех” ХХК нь ЭМЯ-наас явуулын 3 эмнэлгийн автомашин, тоног төхөөрөмж худалдан авах тендерт шалгарч суурилуулсан тоног төхөөрөмжүүд нь бүгд ХБНГУ-д үйлдвэрлэсэн гэх боловч техникийн хувьд хийц, хүчин чадал, бартаа туулах чадвар муутай, мэс ажилбар хийх автомашинд байх ёстой эмнэлгийн тоног төхөөрөмж бүрэн бус, хятад, солонгос, япон улсад үйлдвэрлэсэн янз бүрийн улсын эмнэлгийн хэрэгслээр тоноглосон машиныг оруулсан болохыг тогтоон шалгаж байгаа гэнэ.