Өнгөрсөн долоо хоногт Европын холбооны нэгэн улсад манай улсын төрийн дээд өндөр албан тушаал хашиж байгаа таван эрхэм мөнгө угаасан хэрэгт шалгагдаж байгаа талаар бид мэдээлж байсан.  Гэхдээ дээрх эрхмүүдийн нэрсийг, холбогдох улстай нь  нууцалж байсан  юм. Энэ дагуу ТЕГ-т очиж лавлахад, ийм хэргийн талаар бичиг манай дээр ирсэн. Гэхдээ маш өндөр нууцлалын зэрэгтэй бичиг ирсэн учир хэргийг нууцалж байгаа гэх хариуг өгсөн юм.

Тэгвэл эл мөнгө угаа¬сан гэх хэрэгт нэр нь хол¬богдсон эрхмүүдийн нэг нь ХБНГУ-д элчин сайдаар сууж буй Б.Даваадорж хэмээн эх сурвалж мэдээллээ. 

Уг хэргийг тодруулбал,  түүний данс руу манай улсын нөлөө бүхий дөрвөн өндөр албан тушаалтан 201 мянган ев¬рог таван удаагийн үйлдлээр шилжүүлсэн байгаа юм.

Герман улсын хуульд зааснаар 50 мянгаас дээш ам.долларын гүйлгээ орлого эсвэл зарлагаар үйлдэгдвэл шалгадаг. Гэтэл манай улсаас тус улсад элчин сайдаар сууж буй Б.Даваадоржийн дансанд 201 мянган евро таван удаагийн үйлдлээр орсон тул тус улсын хууль хяналтынханыг эл үйлдлийг шалгахад хүргэжээ.

Германчууд Д.Тэрбишдагвийг элчин сайд байхад нь хүний наймаатай холбогдсон хэмээн шүүж байсан.  Тэр үеэс тус улсынхан Монголын элчин сайд, дипломатчдыг нарийн нягт шалгаж, анхааралдаа авсан нь ойлгомжтой. Гэтэл үүнд нь  Б.Даваадорж ийн өртлөө.

Мөн Б.Даваадоржоос гадна Герман, Белгид ажилладаг элчин сайдын яамны ажилчдын дансыг шалгаж эхэлсэн байна. Хэрэв ямар нэгэн зөрчил илэрвэл сэжиглэгдэн байцаагдах хүмүүсийн тоо бас л нэмэгдэх юм.

Ямартаа ч Германы тал Б.Даваадоржийн орсон гарсан бүх дансыг дахин шалгахад өөрийн цалин болон бүх төлбөр тооцоогоо Монгол руу явуулдаг байсныг тогтоожээ.

Өөрөөр хэлбэл манай улсын нөлөө бүхий дөрвөн эрхэм монголоос түүний данс руу 201 мянган еврог таван удаагийн үйлдлээр шилжүүлж байсан нь баримтаар тогтоогдсон гэсэн үг. Тиймээс Б.Даваадоржийг тус улсын хуулийн дагуу нэн даруй баривчлан саатуулах ёстой боловч түүний дипломат эрх нь уг хэргийг үргэлжүүлэн шалгахад хүндрэл учруулаад байгаа юм байна.

Хэрвээ тэрбээр энэ хэрэгт буруутай нь нотлогдвол түүнийг үүрэгт ажил буюу элчин сайдынх нь албан тушаалаас чөлөөлөөд зогсохгүй  эрүү үүсгэн шалгаж  эхлэх юм.

Ямартаа ч дээрх хэрэг Европынхон Монголын сайд болоод дипломат төлөөлөгчдөд итгэхгүй байгаагийн тод илрэл болж байна.