Дорнод аймагт газрын тос олборлодог "Петрочайна Дачин Тамсаг" үйлдвэрийн ажилчид өнгөрсөн баасан гарагаас ажил хаялт зарлаад байгаа билээ. Тэднийг цалингаа нэмэгдүүлэх шаардлага тавин ажил хаяж байх үед үйлдвэрийн ойролцоо хээрийн түймэр дэгдсэн талаар орон нутгийн dnews.mn сайт мэдээллээ.

  Түймэр өчигдөр 14 цагийн орчимд Матад сумын нутаг Сангийн далай орчмоор гарсан байна. Салхи ихтэй байсан тул түймрийн голомт хэд хэдэн хэсэг тархаж ихээхэн хэмжээний талбайг хамарчээ. Ялангуяа газрын тосны олборлолтын цооногуудад маш ойрхон асч байсан аж. Ажил хаясан 50 гаруй монгол ажилчин арваад машинтайгаар 19 цагийн орчинд түймрийг унтрааж чадсан байна.

Харин Тамсагт байрлаж байгаа 1500 гаруй хятадаас нэг нь ч түймэр унтраахад оролцоогүй гэж тус сайт мэдээллээ. Энэ түймэр 2013 он гарсаар Тамсагт ассан 4 дэх түймэр гэнэ. Түймрийн шалтгааныг хараахан тодруулаагүй байна.