АТГ-ын Мөрдөн шалгах хэлтсийн мөрдөн байцаагч Б.Бат-Олзвой, Сэлэнгэ аймгийн Цагдаагийн газрын Эрүүгийн тасгийн дарга П.Өлзийсайхан, эрүүгийн төлөөлөгч, хурандаа Г.Ганболд  нарт холбогдох давж заалдах шатны шүүх хурал нөгөөдөр Нийслэлийн шүүхэд болно. Уг шүүх хуралд прокурор М.Сүхчулуун, өмгөөлөгчөөр Б.Лхагвацэрэн, Н.Сосорбарам нар оролцох юм байна.

Мөрдөн байцаагч Б.Бат-Олзвой, Эрүүгийн тасгийн дарга П.Өлзийсайхан нарт холбогдох анхан шатны шүүх хурал Сонгинохайрхан дүүргийн шүүхэд болж хэргийг нь хэрэгсэхгүй болгож байсан юм байна. Харин тэдний хохирогч нар анхан шатны шүүхийн шийдвэрийг эсэргүүцэж Нийслэлийн шүүхэд гомдол гаргажээ. Тэднийг Эрүүгийн хуулийн тусгай ангийн 249.1 дүгээр зүйлд зааснаар хүнийг хууль бусаар баривчилсан, 251.1-т эрүү шүүлт тулгасан, 253.2 дугаар зүйлд заасан нотлох баримт хуурамчаар бүрдүүлсэн гэмт хэрэгт буруутган прокуророос яллах дүгнэлт үйлдэн шүүхэд шилжүүлсэн байна.
Тодруулбал, Сэлэнгэ аймгийн орлогч прокуророор ажиллаж байсан Ш.Болд-Эрдэнэ АТГ-ын Мөрдөн шалгах хэлтстийн мөрдөн байцаагч Б.Бат-Олзвой, нотлох баримт цуглуулах ажиллагаанд оролцсон ЭЦГ-ын ажилтан, дэд хурандаа Г.Ганболд, Сэлэнгэ аймгийн Цагдаагийн газрын Эрүүгийн тасгийн дарга, дэд хурандаа Н.Өлзийсайхан нар хүн хууль бусаар баривчилсан, эрүү шүүлт тулгасан, хууль бусаар нотлох баримт бүрдүүлсэн хэмээн гомдол гаргасан. Харин одоо Сэлэнгэ аймгийн Цагдаагийн газрын Эрүүгийн тасгийн дарга П.Өлзийсайханд Улсын ерөнхий прокурорын дэргэдэх Мөрдөн байцаах албанаас эрүүгийн хэрэг үүсгэн Цагдан хорих 461 дүгээр ангид хорьсон байгаа. Түүнийг эрх мэдлээ урвуулан ашигласан, авлига, хээл хахууль авсан гэх гурван зүйл ангиар эрүүгийн хэрэг үүсгэн шалгаж байгаа юм байна.