Гэр бүлээрээ нийлж хар тамхи хилээр гарган зөөвөрлөж, бусдад худалдахыг завдсан хэрэгт буруутгагдсан С.Наранбаатар, Ч.Эрдэнэбаатар, Э.Гоомарал, Э.Оюун, О.Навчаа, Хятад улсын иргэн Вонг Син Ян, Р.Лена нарын давж заалдах шүүх хурал хэд хоногийн өмнө Цагдан хорих төвийн шүүх хурлын танхимд болжээ. Аав ээж нь хоёр охинтойгоо хүргэнтэйгээ нийлж гэмт хэрэг үйлдсэн байна. Э.Гоомарал, Э.Оюун хоёр нь Ч.Эрдэнэбаатарын охин бөгөөд Э.Гоомаралын нөхөр нь С.Наранбаатар ажээ. Эд нарт холбогдох анхан шатны шүүх хурал өнгөрсөн нэгдүгээр сард Баянзүрх дүүргийн шүүхэд  болсон ч хамсаатан гэх хоёр хүнд холбогдох хэргийг нь цагаатгаж, бусдад нь чанга дэглэмтэй хорих ангид 10-15 жил хорих ялыг тус бүр оноосон билээ. Тэд уг шийдвэрийг эсэргүүцэж өмгөөлөгчөөрөө дамжуулан давж заалдах гомдлоо гаргасан ч анхан шатны шүүхийн шийдвэрийг нь хэвээр үлдээжээ. Тиймээс дараагийн шатны шүүх болох хяналтын шатны шүүхэд хандах болно гэдгээ мэдэгдсэн байна. Одоогоор хавтаст хэрэг Дээд шүүхэд ирээгүй байгаа ажээ.

Харин Хятад улсын иргэн Вонг Син Яныг гэмт хэргийн толгойлогч, бусдыг энэ төрлийн хэрэгт уруу татсан гэдэг үндэслэлээр буруутгасан хэрнээ хэргийг нь хэрэгсэхгүй болгож цагаатгажээ.