“Ертөнц” цомог “Hi-Fi Records”-ийн шилдэг борлуулалттай цомгийн жагсаалтыг 11 долоо хоногийн турш тэргүүлж, шилдэг цомгоор шалгарч, хөгжим сонирхогчдын дунд дөрвөн сарын турш “хит” байсаар байгаа. Тэгвэл "Ертөнц" цомог тоглолт болон тун удахгүй үзэгч, сонсогчдын хүртээл болох нь. Ирэх долдугаар сарын 5-аас наймдугаар сарын 19-нийг хүртэл Монголын Хүүхдийн ордны бэсрэг танхимд тоглогдох “Universe Live” тоглолтын бэлтгэл ажил хэдийнээ эхэлчихээд байгаа аж. “Universe Live” тоглолтонд “Ертөнц” цомгоос гадна “Introduction to Nomads” цомгийн “Бороо” бүтээл тоглогдох юм байна.

Уг тоглолтонд “Ертөнц” цомгийн хөгжмийн зохиолч Г.Онон даралтат хөгжим, товшуур, хэц, хэл хуурыг эгшиглүүлэх бол продюсер М.Болд ерөөл, товшуур тоглох бол “A Sound” хамтлагийн хөгжимчин Ц.Алтангэрэл буюу Атка гитар, хобис, Ю.Батпүрэв бөмбөр, Д.Мөнхболд басс гитар тоглох юм. Мөн “Бөртэ” хамтлагийн хөгжимчин Ч.Мөнх-Эрдэнэ ятга, хөгжимчин Ш.Баяржаргал даралтат хөгжим, Л.Саруулбат лимбэ, флейт тоглон “Ертөнц” цомгийг эгшиглүүлэх аж.