Хууль зүйн сайд Х.Тэмүүжин Европын аюулгүй байдлын хамтын ажиллагааны байгууллага /ЕАБХАБ/-ын даргын тусгай төлөөлөгч, Элчин сайд Владимир Ельченко тэргүүтэй төлөөлөгчдийг өнөөдөр хүлээн авч уулзлаа.

       Уулзалтын эхэнд ноён Элчин сайд Владимир Ельченко танай улс өнгөрсөн дөрөвдүгээр сард Ардчилсан орнуудын хамтын нийгэмлэгийн чуулга уулзалтыг маш амжилттай зохион байгуулсан. Та бүхний хэлэлцсэн хэлэлцээр дээр суурьлаад цаашид Монгол Улстай хэрхэн хамтран ажиллах, ямар чиглэлээр тусламж дэмжлэг авах хүсэлтэй байгаа талаар санал солилцохоо илэрхийлэв.

       Хууль зүйн сайд Х.Тэмүүжин хууль зүйн салбарт хийж байгаа шинэчлэлийн хүрээнд хил хамгаалах болон цагдаагийн байгууллагын шинэтгэлд анхаарч ажиллана. Цагдаагийн байгууллага хуучин нийгэмд дэг журам сахиулахдаа цэрэгжсэн зохион байгуулалттай байсан бол одоо хуулийг хэрхэн сахиулах, олон нийтийн аюулгүй байдлыг хангах чиг үүрэгт нь чиглүүлнэ гэдгийг онцлов. Мөн улс дамнасан зохион байгуулалттай гэмт хэрэгтэй тэмцэх Мөрдөх алба байгуулна. Сүүлийн үед гарч байгаа хүний наймаа, хар тамхи, мөнгө угаах зэрэг зохион байгуулалттай үйлдэгддэг гэмт хэргүүд Монголд том сорилт болж байна гэдгийг дурдаад, Мөрдөх албыг шинэ арга барил, техник хэрэгсэл, дэд бүтцээр хангах хэрэгтэй байгааг онцлов. Мөн хууль сахиулах салбарт ажиллах боловсон хүчинг бэлтгэдэг ХСИС-ийн сургалтын арга барил, дэд бүтцэд өөрчлөлт оруулах шаардлагатай бий. Эдгээр өөрчлөлтийг хийхгүй бол шинэчлэл үр дүнгүй болно гэв.

       Элчин сайд Владимир Ельченко дээрх асуудлаар хамтран ажиллахад ЕАБХАБ маш их туршлага хуримтлуулсан гэдгийг дурдаад, газар дээр очиж туршлага судлах нь чухал гэдгийг онцолсон байна.