Өнөөдөр олон улын хүүхдийн эрхийг хамгаалах өдөр. Хамгийн ганган хувцсаа өмссөн бяцхан үрс, эцэг эх, эгч ахынхаа хамт хотын хаа сайгүй хөөрөлдөөд эхэлчихжээ.

Тоглолт үзье эсвэл парк дээр тоглоё гээд  л бүгдийг хийхийг хүсч байгаа хүүхэдтэйгээ эхлээд хаашаа явахаа мэдэхгүй байгаа эцэг, эхчүүддээ эсвэл өнөөдрийн баярын өдрөө хэрхэн тэмдэглэхээ олж чадаагүй байгаа  хүүхдүүдээ зориулж энэ өдөр хаана, юу болохыг дэлгэрэнгүйгээр хүргэж байна.

“Олон улсын хүүхдийн эрхийг хамгаалах өдөр”-өөр нийслэлийн Засаг дарга бөгөөд Улаанбаатар хотын Захирагч Э.Бат-Үүл Клиникийн 1-р амаржих газар, нийслэлийн Засаг даргын Хөдөлмөр эрхлэлт, нийгмийн хамгааллын асуудал хариуцсан орлогч Ц.Буяндалай  2-р амаржих газар, нийслэлийн Засаг даргын Нийгмийн хөгжлийн асуудал хариуцсан орлогч Ц.Энхцэнгэл 3-р амаржих газрын үйл ажиллагаатай танилцаж, баярынхаа өдөр мэндэлсэн нийслэлийн шинэ иргэнээ угтан авч, баярын бэлэг гардуулна.

“Олон улсын хүүхдийн эрхийг хамгаалах өдөр”-ийн нэгдсэн арга хэмжээ  Сүхбаатарын талбай дээр 11 цагаас эхлэх бол тус арга хэмжээг нийслэлийн Засаг дарга нээж үг хэлнэ. Энэ үеэр Монголын Сурагчдын холбоо, Хүүхдийн төлөө Үндэсний газраас зохион байгуулж буй 2000 хүүхэд оролцсон баярын парад, 1400 хүүхдийн Флаш Моб, “Байгалиар гоёдог миний гэр бүл” хүүхдийн зохиомжит хөтөлбөр, урлагийн тоглолт, хүүхдийн дууны уралдаан зэрэг олон төрлийн арга хэмжээ зохион байгуулагдах юм.

Нэгдсэн арга хэмжээний нээлтийн ажиллагааны дараа нийслэлийн Засаг дарга нийслэлийн Ерөнхий төлөвлөгөөний газраас зохион байгуулсан “Мөрөөдлийн хот” гар зургийн уралдаанд ирсэн  бүтээлүүдээр Монголын Үндэсний музейд гаргасан 1200 хүүхдийн үзэсгэлэнтэй танилцана. Тэгвэл өнөөдөр бүхий л хүүхэд багачуудад музейнүүд үнэг үйлчлэх бөгөөд хүүхдүүд маань  дуртай музейгээрээ зочилж болно.

Хүүхдийн баярыг тохиолдуулан маш олон байгууллага арга хэмжээ зохион байгуулж буйгаас залуусын нэгдэл болсон “Таны оролцоо” клубынхэн бусдаасаа өөрөөр байхаар шийджээ. Тус клубын залуус хүүхдийн баяраар бэлэг тараахаар болсон байна. Тэд уг арга хэмжээгээ “Бэлэг” гэж нэрлэсэн бөгөөд Сонгинохайрхан дүүргийн 27 дугаар хороотой хамтарч байгаа аж. “Таны оролцоо” клубынхэн өрхийн орлого тааруу, ядуу гэх тодоттолтой айлуудын бяцхан үрсэд бэлэг өгөх юм. Ингэхдээ тухайн айлын ямар нэгэн эвдэрч сүйдсэн зүйлийг засаж, хэрэгцээтэй зүйлсийг нь хийж өгөн сэтгэлийн жаахан ч гэсэн дэм болохоор төлөвлөж байгаа аж. Энэхүү арга хэмжээнд “Фэйсбүүк” сургуулийн 300 гаруй залуус нэгдэж байгаа бөгөөд хүссэн хүн бүр оролцох боломжтой гэнэ. Хэрвээ энэ аянд нэгдэх сонирхолтой хүн байвал маргааш 09-11 цагийн хооронд Улсын драмын театрын урд клубынхэнтэй уулзаж болох аж. “Таны оролцоо” клуб нь Олон улсын хүүхдийн эрхийг хамгаалах өдрийг тохиолдуулан хромсомын өөрчлөлттэй 40 гаруй хүүхдэд туслахаас гадна 500 гаруй хүүхдийг баярлуулахаар болжээ. Түүнчлэн "Халуун сэтгэл" клубынхан алиагч болж хүүхдээ баярлуулах юм.

    Хүүхдийн баярыг тохиолдуулан фэйсбүүк дэх “Найрсаг залуусын цагаан тагтаа” бүлгэм хүүхдүүдэд шаар бэлэглэхээр болжээ.

Бүлгэмийн логотой пудволкаар жигдэрсэн 100 залуус эх үрсийн баяраа тэмдэглэж яваа бяцхан үрсэд шаар үлээж бэлэглэхээс гадна нүүр гар дээр нь зураг зурж өгөх, ундаа бэлэглэх зэрэг ажил хийхээр төлөвлөжээ.

 Тэд “Тэнгис” кино театрын хажууд байрлах “Happiness Center Mongolia”-д цуглаж, тэндээсээ Сүхбаатарын талбайгаар дайран парк хүртэл явах бөгөөд замдаа 1000 хүүхдийг баярлуулж, шаар бэлэглэх аж.

“Тэнгис” кино театрынхан хүүхдийн баяраар тэр болгон баярлаж чаддаггүй амьдралын түвшин доогуур айл өрхийн хүүхдүүдийг баярлуулж, үнэ төлбөргүй кино үзүүлэх юм байна. Энэ өдрүүдэд тус театрт “Сайн, муу хэрцгий эргэж ирсэн нь”, “Миний амьдралын хамгийн том бэлэг”, “Эпис” зэрэг хүүхэд болон бүх насныханд зориулсан кинонууд гарах бол “Өргөө 1 ”, “Өргөө 2” кино театрт өнөөдөр, маргааш “Эпис”, “Ларьдма”, “Сайн муу хэрцгий” зэрэг кино гарах юм. Харин “Соёмбо” кино театрынхан 10.00- 23.30 цагийн хооронд ажиллах бөгөөд 12:00-18:00 цагт хүүхдүүдэд зориулсан караоке ажиллуулах юм байна. Ингэхдээ 50 хувийн хөнгөлөлт зарлажээ.

    Улсын драмын эрдмийн театрт Боловсрол, шинжлэх ухааны яамнаас зарласан хүүхдийн уран бүтээлийн улсын уралдаанд шалгарсан шилдэг бүтээл болох “Онц сурлагатнууд орохыг хориглоно” хүүхдийн шилдэг драмын жүжгийг өнөөдөр,  маргааш толилуулна.
УБ паласт “Дэлхийн илбэ Монгол” тоглолт болно

Улаанбаатар паласт хүүхдийн баярын өдрийн 14.00, 19.00 цагт концертын танхимд “Дэлхийн илбэ Монгол” тоглолт, 12.00, 16.00, 18.00 цагуудад баярын тоглолттой.

“Мөрөөдлийн театр”-ын авъяаслаг жүжигчид “Тусгаар тогтнолын ордон”-д ням гарагийг дуустал 10.00, 12.00, 14.00, 16.00 цагуудаас тоглоно. Тасалбар 15000 төгрөг юм байна.

    Монголын үйлдвэрчний эвлэлийн соёлын төв ордонд 12.00,14.00 цагт “Маск” продакшныхан “Буратино” хүүхдийн жүжгээрээ бэлэг барина. Мөн 19.00 цагаас “Зун цаг сайхан” цоо шино шоу тоглолтоо толилуулахаар бэлджээ.

 УДБЭТ-т “Цэнхэр нүдэн бүсгүй” балетийн тоглолттой
Улсын дуурь бүжгийн эрдмийн театрт хүүхдийн баярын өдөр 17.00 цагаас хүүхдийн концерт, зургаадугаар сарын 2-ны 17.00 цагаас “Цэнхэр нүдэн бүсгүй” балетын тоглолттой болно.

“Шинэ цирк” төвөөс Хятадын жүжигчид, ОХУ-ын циркийн сургуультай амьтдыг жүжигчидтэй нь хамт урьж “Хөрш гурав” нэртэй тоглолт хийж байгаа билээ.  Өнөөдөр 10.00, 14.00, 18.00 цагуудаас тоглох тул Аса циркийг зориорой. Гурав хүртэлх насны багачуудад үнэгүй. Харин 3-15 настай хүүхдүүд 10000, том хүн 15000 төгрөгийн билет авах юм.

Өнөөдөр 12.00, 14.00 цагт Улсын Филармоны Концертын их танхимд Морин хуурийн чуулгынхан Х.Сен Санс “Амьтдын ертөнц” тоглолттой. Удирдаач Ардын жүжигчин Ц.Батчулуун удирдах энэхүү тоглолт 5000 төгрөгийн үнэтэй.

Хүүхэлдэйн театрын их тайзнаа зургаадугаар сарын 1-нд 11.00, 13.00, 15.00 цагаас Монгол ардын үлгэр “Болдоггүй бор өвгөн” “Лусын хааны охид” жүжгийг тус тус тоглоно.

Үндэсний соёл амралтын хүрээлэнд Бонгын шоу, хөгжим бүжгийн үзүүлбэр, хүүхэлдэйн театрын тоглолтуудыг бүх насны хүүхдүүдэд зориулан тоглох юм.

 “Улаанбаатар” чуулгын уран бүтээлчид 5-10 насны багачууддаа зориулан “Янзган хүрээ” мюзикль, “Алтан түлхүүр”, “Миний чин зоригт бяцхан найз” адал явдалт жүжгүүдийг, 11-16 насныханд “Мөрөөдлийн үзэг” “Хайрт Долгор багш”, “Галт тэрэгний тасалбар” хүүхдийн жүжгииг өнөөдөр тоглох аж. Эдгээр тоглолтын тасалбараараа Үндэсний соёл амралтын хүрээлэнд 20 хувь, Оюун ухааны олон улсын музей болон “Сантис” сургалтын төвийн зуны сургалт, Сэтгэл судлалын үндэсний төв, “Боломж дандаа чиний гарт” сургалт, Хүний нөөцийн сургалт хөгжлийн хүрээлэнгийн зуны сургалтуудад тус тус 10 хувийн хөнгөлөлт эдэлж, “Скайтел” компанийн D20 үйлчилгээнд сугалаа сугалах эрх өгөхөөр болжээ.

13.30 цагаас Монгол Хүүхдийн ордонд нийслэлийн 9 дүүрэг, 152 хорооны төлөөлөл болсон 500 хүүхэдтэй уулзаж, баярын бэлэг гардуулна. Мөн “Шинэ үе” продакшны  хүүхдийн жүжгийн сонирхоорой.