МАН-ын гишүүд ингэж асууж байна. Энэ хоёр эрхэмийг үгүйлэн санасан гэхээсээ илүү эргэлзсэн, гайхсан бас цөхөрсөн хандлага МАН-ын гишүүд дунд давамгайлах болжээ. Нэг нь биеэ, нөгөө нь эхнэрээ эмчилүүлнэ гээд хилийн дээс алхцгаасан. Хэн ч өвдөж зовж болно. Тэдний хилийн дээс алхсан энэ байдлыг хэн ч ойлгож дэмжинэ. Хэцүү үе болгонд нь дэмжиж тулсан нам нь ялагдаад хүндхэн байхад сураггүй алдарсныг нь харин ойлгоход төвөгтэй юм.

МАН-ынхан нэр дэвшигч Б.Бат-Эрдэнийгээн бүх л боломжоороо дэмжиж байна. Б.Бат-Эрдэнэд өвдөг шороодсон гэж гомдлолгүй Ө.Энхтүвшин төв штабыг нь толгойлж байна. М.Энхболд хот хөдөөг холбож гол зохицуулагчаар сууж байна. Сү.Батболд Улаанбаатарын уулзалтуудад дагаж хүүхдийн парк, гэр хороололд ажиллахад нь хүртэл ард түмнийг цуглуулах ажлуудыг амжуулж явна. Д.Дэмбэрэл, Ц.Нямдорж, Д.Лүндээжанцангаас эхлээд МАН-ын залуу боловсон хүчнүүд, эмэгтэй гишүүд бүгдээрээ л мачийтлаа зүтгэж байгаа аж.

Харин хоёрхон эрхэм сонгуулийн сурталчилгаа дундаа орж байхад сураггүй. С.Баяр хэмээх сонгууль болгонд сойсон морио түрүүлүүлдэг гэсэн домогтой эр өмнөх УИХ болоод орон нутгийн сонгуульд алдарсан шигээ таг чиг. Энэ нөхөр ер нь намаасаа, улс төрөөсөө холдож байгаа шинжтэй. Түүнийг өвчтэй зовлонтой байхад МАН-ын жирийн гишүүдээсээ эхлээд удирдлагаа хүртэл эргэж тойрч дэмжиж тусалж байсан даа. Харин тэрээр намаа удаа дараа ялагдаад хүндхэн байхад нь хувийн амьдралаа төвхнүүлээд тоосон шинжгүй яваа сурагтай. Намаа боддог байсан бол УИХ орон нутагаа байг ээ гэхэд ерөнхийлөгчийн сонгуулиар нь ирээд ажиллаж болно доо. Түүний амиа бодсон энэ хандлага ардын намынхны төдийгүй ард түмний ч гайхлыг төрүүлж байгаа.

Б.Бат-Эрдэнийн ард ассан танк шиг зогсох ёстой өөр нэгэн эрхэм бол У.Хүрэлсүх. “Халхын сайхан аваргаа дэмжинээ” гэсэн үг интернет орчинд үлдээчихээд бас л таг чиг. Үүнийгээ арай дэмжлэг гэж эндүүрээгүй байлгүй дээ. Эх сурвалжийн мэдээлж байгаагаар бол ах дүү, хамаатан садантайгаа Австрали тивд жарганхан суугаа бололтой. Уг нь тэр ийм л үед ирж намаа дэмжиж залуусаа жагсаах үүрэгтэй хүн л дээ. Өдийд л түүний зоримог хурц мэдэгдэлүүдээр МАН дутаастай. Хэрэв тэр энэ сонгуульд ирж ажиллахгүй бол тун муухай имижтэй үлдэнэ. Бас д.Бодоо, Х.Чойбалсангийн намаа хэнээр ч доромжлуулахгүй, ямар ч үд өмөөрнө гээд байдаг “улаан хамгаалагч”-ийн дүрийг худлаа бүтээж байсан гэдэг нь ойлгогдоно. Тэрээр явахдаа намынхаа дарга болохоор эргэж ирнэ гэж журмын нөхөддөө хэлсэн гэдэг. Тэр үгэндээ эзэн болох гээд хүрээд ирэхэд гишүүд нь харин түүнээс нүүр буруулчихаад сууж байхыг үгүйсгэхгүй. Эсвэл сонгуулийн сүүлийн өдрүүдэд ирж туг эргүүлнэ гэж төлөвлөөд байгаа юм болов уу?

Ийм сонирхолтой экс удирдлагуудаа МАН-ынхан битүүхэн хүлээгээстэй. Эх сурвалжийн мэдээлж байгаагаар бол хүлээж ядаад цөхөрч байгаа бололтой. Бас С.Баяр, У.Хүрэлсүх хоёр нэр дэвшигчийнхээ санхүүжилт болоод зохион байгуулалт, стратеги гээд бүхий л ажилд нь хойрго хандсан сурагтай. МАН С.Баяргүй, У.Хүрэлсүхгүй цааш ялж, ялагдаад явах л байх. Харин С.Баяр, У.Хүрэлсүх хоёр МАН-гүй амьдарч чадах болов уу?