Өчигдөр болсон нэгэн шоу тоглолт цагтаа эхэлж, цагтаа дууссан гэвэл та итгэх үү. Аливаа тоглолт цагаасаа хоцорч эхлэн, сунжирч дуусдаг хэвшлийг халсан “Татар” хамтлагийн залуус “Нөлөөллөөс дээгүүрт” аяны нээлтэд зориулсан энэхүү тоглолтоороо нийгэмд зөв хэвшлийг түгээж буйгаа үгээр биш үйлдлээрээ харуулав.

Шинэ цомог, шинэ аян, шинэ уран бүтээлээрээ шинэ түүх эхлүүлж буй “Татар” хамтлагийнхан өчигдөр “Үндэсний соёл амралтын хүрээлэн”-д хүүхэд, залуустай болзсон юм. Энэ жил 10 нас хүрч буй “Татар”-ынхан эрийн цээнд хүрч, уран бүтээлээрээ дамжуулан нийгмийн сайн сайхны төлөө дуу хоолойгоо өргөхөөр нэгдэж, “Нөлөөллөөс дээгүүрт” хэмээх аян өрнүүлээд байгаа. Энэ аяны нээлт өчигдөр болсон нь энэ. Тэд ойн баяртаа зориулж, “Нөлөөллөөс дээгүүрт” цомог гаргасан бөгөөд цомгийн баяраа хийж, фенүүдтэйгээ уулзахаас гадна нийгэмд чиглэсэн олон ажил хийхээр зорьсоны нэг нь уг аян юм. Тиймдээ  ч цомгийнхоо нэрээр нэрлэсэн аянаа "Архины эсрэг" уриан дор бүтэн жилийн хугацаанд хэрэгжүүлэхээр төлөвлөжээ.

“...Дурлалаар бороо нь ордог
 Дуугарч амжилгүй хацар минь нордог...” хэмээн дуулсаар “Татар”-чууд тайзнаа гарч ирлээ. Тэдний “Бороо”, “Чинийх”, “Бусдын хайрыг хүндэл”, “Эсрэг өдөр” гээд хит дуунууд нь ар араасаа хөвөрч, залуус даган бүжиглэв. Үзэгчид "Татар"-ыг санажээ.

“Татар”-ын дуу бүхэн хит болдог. Тэд үүнийг хийж чаддаг, цаашид ч чадна гэдгийг нь өчигдөр тайзнаа дуулсан шинэ уран бүтээлээс нь залуус мэдэрсэн байх. Дуучин А Cool-тэй хамтарсан “Би чиний хайр” дуу хэдийнэ сонсогчдод хүрч, фэнүүдийнх нь дуртай дуу болсон бол энэ удаад тэд “Киви” хамтлагийн Укатай хамтран дуулсан “Санахгүй юм байна” гэх эрч хүчтэй, цоглог дуугаа  анх удаа сонсголоо. “Татар”-чуудын хамт хуучны танил болоод удахгүй дотносох уран бүтээлүүдийг нь сонсоход хоёр цаг богинохон санагдав.

Нийгэмд зөв хэвшил, хэрэглээ бий болгох зорилго өвөртөлсөн залуус шинэ цомгоо 1000 төгрөгөөр борлуулж, орлогоо бүгдийг нь архины эсрэг үйл ажиллагаа явуулдаг байгууллагуудад хандивлана гэжээ. Аяны хүрээнд тэд “Нөлөөллөөс дээгүүрт” цомгийн баяраа энэ сарын 5-наас эхлэн бүтэн жилийн турш үргэлжлүүлж, нийслэл хотоо тойрон 60 удаагийн  тоглолт хийхээр төлөвлөсөн байна. Тэдний нийслэл дэх "Аялан тоглолт" дүүргүүдийн задгай талбайд үнэ төлбөргүй болохыг сануулъя. Тоглолтын үеэр мөн хандивын данс аялуулж, цугласан мөнгийг архидалтын эсрэг үйл ажиллагаанд зарцуулах юм байна. “Татар” хамтлагийн 10 жилийн ойдоо барьж буй бэлэг болох уг аян зөвхөн нийслэл хотод өрнөөд зогсохгүй ирэх намраас орон нутагт үргэлжилнэ.

Нийгмийн хариуцлагаа ухамсарлан, бусдын төлөө зорилго нэгдсэн "Татар"-ын залуустаа амжилт хүсье. Тэдэнтэй нэгдэж, “Нөлөөллөөс дээгүүрт” амьдарцгаая.