“Татар” хамтлагийнхан өнгөрсөн амралтын өдөр шинэ цомог, шинэ аян, шинэ уран бүтээлээрээ шинэ түүхээ эхлүүлж буй албан ёсоор зарлан Үндэсний соёл амралтын хүрээлэнд “Нөлөөллөөс дээгүүрт” аяны нээлтээ хийсэн юм. Тэгвэл тэд амласан ёсоор өнөөдрөөс эхлэн нийслэлийн залууст үнэ төлбөргүй хүрэх “Аялан тоглолт”-оо Сонгинохайрхан дүүргийн Баянхошууны Хөтөл дээр 19.00 цагт эхлүүлэхээр болзлоо.

   Энэ жил 10 нас хүрч буй “Татар”-ынхан эрийн цээнд хүрч, уран бүтээлээрээ дамжуулан нийгмийн сайн сайхны төлөө дуу хоолойгоо өргөхөөр эргэн нэгдсэн юм. Тэд ойн баяртаа зориулж, “Нөлөөллөөс дээгүүрт” цомог гаргасан бөгөөд цомгийн баяраа хийж, фенүүдтэйгээ уулзахаас гадна нийгэмд чиглэсэн олон ажил хийхээр зорьсоны нэг нь уг аян юм. Тиймдээ  ч цомгийнхоо нэрээр нэрлэсэн аянаа "Архины эсрэг" уриан дор бүтэн жилийн хугацаанд хэрэгжүүлэхээр төлөвлөжээ.

   Нийслэлд хийх аялан тоглолтдоо “Татар”-чууд  “Бороо”, “Чинийх”, “Бусдын хайрыг хүндэл”, “Эсрэг өдөр” гээд хит дуунудаараа залуусыг доргиохоос гадна шинэ цомгийн уран бүтээлээ ч хүргэхээ амлаад байгаа шүү. Тоглолтын үеэр нийгэмд зөв хэвшил, хэрэглээ бий болгох зорилго өвөртөлсөн залуус “Нөлөөллөөс дээгүүрт” шинэ цомгоо 1000 төгрөгөөр борлуулж, орлогоо бүгдийг нь архины эсрэг үйл ажиллагаа явуулдаг байгууллагуудад хандивлана гэдгээ дуулгасан шүү. Аяны хүрээнд тэд “Нөлөөллөөс дээгүүрт” цомгийн баяраа нийслэл хотоо тойрон 60 удаагийн  тоглолт хийхээр төлөвлөсөн байна. Тэдний нийслэл дэх "Аялан тоглолт" дүүргүүдийн задгай талбайд үнэ төлбөргүй болохыг сануулъя. Тоглолтын үеэр мөн хандивын данс аялуулж, цугласан мөнгийг архидалтын эсрэг үйл ажиллагаанд зарцуулах юм байна. “Татар” хамтлагийн 10 жилийн ойдоо барьж буй бэлэг болох уг аян зөвхөн нийслэл хотод өрнөөд зогсохгүй ирэх намраас орон нутагт үргэлжилнэ.

   Нийгмийн хариуцлагаа ухамсарлан, бусдын төлөө зорилго нэгдсэн "Татар"-ын залуустаа амжилт хүсье. Тэдэнтэй нэгдэж, “Нөлөөллөөс дээгүүрт” амьдарцгаая.