Завхан аймгийн нэг онцлог нь үржил шим сайтай хөрстэй. Бас байгалийн үзэсгэлэн цогцолсон, аялал жуулчлал хөгжүүлэх боломжтой юм. Эндхийн иргэд үр тариагаа тариалж, гурилаа үйлдвэрлэж хэрэгцээгээ 100 хувь хангаж чадаж байна. Түүнчлэн төрөл бүрийн төмс, хүнсний ногоо тариалж, хэрэгцээгээ хангаад зогсохгүй хөрш зэргэлдээ орших Говь-Алтай, Хөвсгөл, Архангай, Увс аймагт “экспортолдог” аж. Нэг үгээр хэлбэл, Завхан аймагт өрхийн үйлдвэрлэл, аж ахуй сайн хөгжжээ. Гэвч үйлдвэрлэлээ өргөжүүлж, бизнесээ тэлье гэхээр дэд бүтэц муу, төрийн дэмжлэг сул байдаг байна. Тиймээс завханчууд МАН-аас нэр дэвшигч Б.Бат-Эрдэнийн  малчдыг “жижиг, дунд үйлдвэрлэл эрхлэгч” гэсэн статустай болгоё гэсэн санаачилгыг дэмжиж байгаагаа илэрхийлж байв. Монгол Улс бол мал аж ахуй хөгжсөн орон. Тиймээс дотоодын нийт бүтээгдэхүүний тодорхой хэсгийг мал аж ахуйн салбараас бүрдүүлдэг. Гэтэл малчдыг төрийн бодлогоор дэмжиж, эрх зүйн чадамжтай үйлдвэрлэгчид болгох нь нийгмийн захиалга болоод байгааг ч хэлж байлаа.

    УИХ-ын гишүүн Д.Оюунхорол “Энэ хүн үнэхээр амьдралын хаттай монгол эр хүн. УИХ-д гурван удаа сонгогдож ажиллахдаа хүнд хэрэгтэй маш олон хууль санаачилж батлуулсан. Б.Бат-Эрдэнэ гишүүн бид хоёр Хүүхдийн тухай хуулийн төсөл дээр хамтран ажиллаж байгаа. Мөн малчдыг “Жижиг, дунд үйлдвэр эрхлэгчид” гэж тодорхойлохоор хууль санаачлан ажиллаж байна. Нийгмийн халамжийн чиглэлээр өмнө нь иргэн бүрт олгож байсан 21000 төгрөгийг сэргээх талаар МАН-ын бүлгээс санаачилга гарган ажиллаж байна. Тэгэхгүй бол өнөөдөр төрийн халамж, үйлчилгээ иргэдээ ялгаварлан гадуурхсан хэлбэрээр явж байна” гэв.  Мөн Монголын төрд өнөөдөр тэнцвэр хэрэгтэй байгаа. Бүх эрх мэдэл нэг намын халаасанд орсноор төрийн хяналт суларч, дураараа дургих үзэгдэл гаарч байгааг ч онцлов.

    Үүнээс гадна нэр дэвшигч Б.Бат-Эрдэнэ арилжааны банкуудын зээлийн хүү өндөр байгааг шүүмжилдэг. Тийм учраас арилжааны банкны зээлийн хүүг бууруулах бодлого барьж ажиллахаа илэрхийлсэн юм. Мөн УИХ-ын гишүүнийхээ хувиар жижиг, дунд үйлдвэрлэл эрхлэгчдэд олгодог зээлийн хүүг ч бууруулах талаар олон зүйл хийж байгаа. Энэ асуудал дээр завханчууд санал нэг байна билээ. Нэг жишээ хэлэхэд, аймгийн өндөр настай иргэд банкнаас тэтгэврийн зээл авдаг. Гэтэл тэр зээлийнх нь жилийн хүү 20-30 хувь хүрдэг талаар гомдоллож байв. Ер нь банкны зээлийн хүүгийн систем арилжааны гэхээсээ ард түмнээ шулах үзэл дээр тулгуурласан. Гэтэл төр үүнийг анхааралдаа авахгүй. Ард түмнийг нь шулж байхад нүдэн балай, чих нь дүлий сууж байна гэж шүүмжилж байлаа.

  МАН-аас Ерөнхийлөгчид нэр дэвшигч Б.Бат-Эрдэнэ Улиастай хотын иргэдтэй санал бодлоо солилцсоныхоо дараа Тосонцэнгэл сумын иргэдтэй уулзлаа. Тус сум 10 мянга гаруй иргэдтэй томоохон сум юм. Цагтаа энэ сум 1000 гаруй ажилчидтай мод бэлтгэлийн үйлдвэрийг түшиглэн боссон түүхтэй. Гэвч бодлогогүй өмч хувьчлалын харгайгаар үйлдвэр нь дампуурснаар өдгөө иргэд гундуухан аж төрж байна. Гэхдээ тэдэнд “Шинэ Ерөнхийлөгч”, “Зөв Ерөнхийлөгч”-тэй болох хүсэл тэмүүлэл дүүрэн байгаа нь харагдсан. Нутгийн иргэд нэр дэвшигч Б.Бат-Эрдэнэд хурдан удмын адуу бэлэглэж, сонгуульд ялалт байгуулахыг ерөөсөн юм.