АНУ-ын Майами хотод болох жүдо бөхийн Гранпри тэмцээнд оролцох Монголын багийн бүрэлдэхүүн тодорчээ. Энэ сарын 15,16-нд болох уг тэмцээн Майами дахь “Трамп Майами” цогцолборт болох юм. Медаль хүртсэн бөхчүүдэд чансааны 300,180,120 оноо тус тус олгох тус тэмцээнд Монголын баг эрэгтэй 10, эмэгтэй хоёр тамирчны бүрэлдэхүүнтэй оролцох ажээ. Зэрэглэлээ ахиулсан уг тэмцээнд эрэгтэйчүүдээс 60 кг-д Г.Хэрлэн, 66 кг-д Б.Хишигбаяр, Б.Батгэрэл, 73 кг-д Х.Цагаанбаатар, 81 кг-д Г.Алтанбагана, Г.Түвшинжаргал, 90 кг-д Х.Цогтгэрэл, -100 кг-д Б.Тэмүүлэн, +100 кг-д Б.Сугаржаргал, Ө.Дүүрэнбаяр нар оролцоно. Харин эмэгтэйчүүдийн 52 кг-д А.Цолмон, 57 кг-д А.Батзул нар өрсөлдөх бөгөөд баг тамирчдыг дасгалжуулагч Д.Баттулга удирдана. Баг тамирчид маргааш эх орноосоо мордох юм.