Төрийн эрх мэдлийг хууль бусаар авах хуйвалдаан зохион байгуулах гэмт хэрэг үйлдэхээр бэлтгэж байсан гэж олон сар баривчлагдсан кино найруулагч Х.Бадамрагчаа суллагдаад байгаа билээ. Энэ хэргийг Нийслэлийн прокуророос нотлох баримт бүрдээгүй, гэмт хэргийн бүрэлдэхүүнгүй гэж хэрэгсэхгүй болгосон. Гэсэн ч төрийн эрх мэдлийг хууль бусаар авах гэсэн гэх энэ хэрэгт Х.Бадамрагчаатай хамт гурван хүнийг саатуулсан бөгөөд бусдыг нь суллачихаад байхад Р.Цэнгэл гэх өвөр монгол иргэнийг өдий болтол шоронд хорисоор байна. Энэ хэрэгт уг нь Х.Бадамрагчаа голлон оролцсон гэж үзэн шалгаж байсан. Ингээд гол хүн нь гэм буруугүй гэдэг нь тогтоогдчихоод байхад хамсаатан гэж шалгуулсан түүхч, зохиолч Р.Цэнгэлийг шоронд хорисоор байгаа нь гэр бүлийнхэн болон, найз нөхдийнх нь гайхлыг төрүүлж байна. Гайхлыг төрүүлэхээс гадна айдаст автуулжээ.

   Р.Цэнгэл ч энэ байдлыг эсэргүүцэн 6-р сарын 6-нд наймдах өдрөө өлсгөлөн зарлаж байна гэсэн мэдээ ирсэн юм. Гэсэн ч хуулийнхан болон эрх баригчид үүнд ямар нэгэн хариу үйлдэл үзүүлээгүй бөгөөд тэрбээр өнөөдөр 14 дэх хоногтоо өлсгөлөн зарлаад байна. Р.Цэнгэл бүр ССАЖ-ын сайд Ц.Оюунгэрэлээс авахуулаад олон хүнд учир байдлаа хэлж, асуудлыг нь шийдэж өгөхийг хүссэн бичиг илгээжээ. Гэсэн ч нэг ч хариу ирэхгүй, түүнийг өлсгөлөн зарласныг үл тоомсорлож байгаа аж.
 
 МАХН-ын дарга Н.Энхбаяр 12 хоног өлсгөлөн зарлаад ямархуу зүс царайтай, биеийн байдал нь хэрхэн дордсон байсныг бид мартаагүй. Тэгвэл өвөр монгол гэдгээрээ, жирийн иргэн гэдгээрээ л түүнээс ялгагдах Р.Цэнгэл ч бас тийм байдалд оржээ. Тэрбээр 1990-ээд оны эхээр Монголд ирсэн бөгөөд Монгол улсын иргэнтэй гэрлэж, охинтой болсон. Мөн урлаг, уран зохиолын салбарт ч багагүй найз нөхөдтэй бөгөөд найруулагч Х.Бадамрагчаатай уран бүтээлээр холбогдсон бололтой. Гэтэл “хэрэг нь хэрэгсэхгүй болсон байхад шоронд хатаан суулгаж байгаа нь хачирхалтай” гэж найз нь ярьж байна.
   Р.Цэнгэл өлсгөлөн зарлаад найм хосныхоо дараа “Цахар хүний цөс зоригоор сайн дураараа үхнэ” гэж хэлжээ. Эх сурвалжийн мэдээлснээр түүнийг хэрэг хүлээ хэмээн хээр аваачиж айлгасан, эрүүдэн шүүсэн, хоригдлуудаар дарамтлуулсан гэх мэдээлэл байна. Бид үүнийг баталж чадахгүй. Гэхдээ Өвөр монгол гэдгээр нь бусад дөрвөн хүнээс шигшиж үлдээгээд хорьж цагдаад байна уу даа гэсэн хардлага байгаа юм. МАХН-ын дарга Н.Энхбаярыг 12 хоног өлсгөлөн зарлахад сүр дуулиан болж, эмнэлэгт хэвтүүлж байсан. Тэгвэл Р.Цэнгэлд эмнэлэгт хэвтдэггүй юмаа гэхэд асуудлаа шийдүүлэх өргөдлийнхөө хариуг авах эрхтэй баймаар.

    Р.Цэнгэл  “Хоржийлоо” хэмээх яг одоогоос 100 жилийн өмнө буюу 1913 онд Богд хааны зарлигаар Өвөр Монголыг чөлөөлсөн тухай баримтат кинонп зөвлөхөөр оролцсон байна. Тэрбээр хятад хэл дээрх материалуудыг орчуулжээ.