Авлигалын дуулиан ч олон улс төрчдийг хөлдөө чирлээ. Н.Энхбаяраар эхэлсэн ажиллагаа түүний улс төрд татан оруулж ирсэн Ё.Отгонбаяраар үргэлжилж байна. Ё.Отгонбаярын гэргийг багагүй хэмжээний мөнгөтэй холбогдуулан цагдан хорьсон. Уг үйл явдлын дараа Ё.Отгонбаяр ихээхэн улс төржсөн. Энэ нь УМБГ-ынхныг хариу мэдэгдэл хийхэд хүргэжээ. Харин цагдаагийнханы мэдэгдэл олон нийтийг цочроолоо.

  Боловсролын сайд байсан, манайдаа л мэдлэг боловсролтой энгийн даруухан гэгддэг хүнийг гэгээн цагаан өдөр Энхтайваны гүүрэн дээр хүн зодуулж машиныг нь булаалгасаныг хөдлөшгүй баримтаар нотолсныг цагдаагийнхан зарлав. Хөдлөшгүй гэдэгийн хувьд зодсон, зодуулсан нь ч Ё.Отгонбаярыг захиалагч гэдэгийг хүлээн зөвшөөрсөн аж.

  Харин одоо Энхтайваны гүүрэн дээрээс булаагдсан Ланд 200 машин хаа байгаа гэдэг нь тодорхойгүй аж. Мөрдөн байцаалтын нууц учир энэ талаар дэлгэрэнгүй мэдээлэхгүй байгаа бололтой.

  Гэхдээ энд анхаарал татах хэд хэдэн зүйл байна. Учир нь энэхүү дуулиант үйл явдал энэ оны гуравдугаар сарын 20 өдөр болжээ. Тухайн үед АН-ынхан авлигалын томоохон хэрэгүүдийн гараас бариад авчихсан олон хүнийг чичрүүлж байсан үе. Ийм цаг үед Ё.Отгонбаяр яавч тийм зүйл хийх хүн биш гэж гаргалгаа гаргах иргэд ч байна. Гэвч цагдаа нотлогдсон гэж мэдэгдэв.
 
  Өөр нэгэн хардлага бас үүсэв. Ё.Отгонбаяр барилгын зөвшөөрөл өгөхгүй байсан. Тэгээд зөвшөөрлөө авах гэхээр авлигал нэхээд байсан. Налайх дүүрэгт барьсан барилгыг ашиглалтад оруулахад нийт орлогын 4/1 буюу 230 сая төгрөгийг авах гэж оролдсон нь бас л нотлогдсон гэсэн. Энд гурван эргэлзээ байгаа юм. Нэгд Ё.Отгонбаяр хэзээ ч барилга барих зөвшөөрөл өгөх эрхтэй байгаагүй. Хоёрт Ё.Отгонбаяр барилгыг ашиглалтад хүлээн авах ажил хэзээ ч хийж байгаагүй. Гуравт тухайн барилгын 4/1 нь 230 сая төгрөгийн ашигтай байсан юм бол нийт ашиг нь 920 сая болж таарна. Ийм ашигтай ганц барилга хаа ч байхгүй гэж энэ салбарынхан тооцоо хийжээ.

  Тиймээс Ё.Отгонбаярыг матсан иргэн Ч нь барилгын ашиг биш хамтарч бизнес хийгээд л сайдыгаа мурисан болов уу даа. Ийм байж л ийм мөнгөний асуудал яригдана. Тэгээд бас тийм зоригтой алхамууд хийж машиныг нь авсан байж болох юм гэсэн хардлага ч байна. Магадгүй энэ нь байж болох хамгийн үндэслэлтэй таамаг байж мэднэ. Энэ талаар Ё.Отгонбаяр удахгүй тайлбар хийх биз.

   Үүнээс гадна Ё.Отгонбаярын эхнэрийн нэр дээрх 26 дансны орлого зарлагыг нарийвчлан судлахад ихээхэн цаг хугацаа орно. Тиймээс түүнийг суллах хүсэлтийг УМБГ-аас прокурорт тавьжээ. Харин Ё.Отгонбаярыг дуудаж асууж лавлах олон асуудал байгаа гэнэ. Гэвч шууд дуудаж болохгүй халдашгүй бүрэн эрхтэй УИХ-ын гишүүн. Тиймээс түүний бүрэн эрхийг түдгэлзүүлж шалгуулах бэлтгэлийг УМБГ-ынхан хийж байгаа аж. Эх сурвалжийн мэдээлж байгаагаар бол энэ долоо хоногтоо багтаад Ё.Отгонбаярын бүрэн эрхийг түдгэлзүүлэх асуудлыг УИХ-ын даргад илгээх аж. Гэвч УИХ 14 хоног завсарлачихсан учир яах вэ гэдэг тодорхойгүй асуудал урган гарч байна. Тиймээс түүний бүрэн эрхийн асуудлыг ээлжит бус чуулган зарлан хуралдуулж шийдвэрлүүлэх эсвэл 14 хоногийн дараа ээлжит чуулган эхлэх үеэр ярилцах хоёр гарц байгаа гэлээ.