ЗГХЭГ-ын дэд даргын ажлаа өгөөд байгаа Г.Дэнзэнгийн эхнэр Д.Уянгыг АТГ-аас шалгаад эрүүгийн хэрэг үүсгэх хүсэлтийг Нийслэлийн прокурорын газарт гаргасан ч татгалзаад байна. УИХ-ын гишүүн Н.Номтойбаярын анх дэлгэсэн 17 тэрбум төгрөгийн тендерийн хэрэгт шалгах ёстой фактууд байгаа ч Нийслэлийн прокурорын газраас "шалгах үндэслэлгүй" гэсэн нь өөрөө үндэслэлгүй сонсогдож байгаа юм. Өнөөдөр АТГ-ын Мөрдөн шалгах хэлтсийн Мөрдөн байцаах албаны дарга Э.Амарбат энэ хэрэг "но"-той гэдгийг батлах дараах мэдээллийг өглөө.

    Э.Амарбат "Энэ хэрэг анхнаасаа тендер шалгаруулалт хууль бусаар явагдсан байна гэх баримтууд тогтоогдсон. Цаашид бид мөрдөн байцаалтаар сонгон шалгалт өөрөө хэрхэн яаж явагдав, үнэлгээний хороо хэрхэн ажилласан бэ гэдгийг шалгах шаардлагатай байгаа. Тиймээс прокурорт дахин шалгуулах хүсэлт гаргасан" гэсэн юм.

Нэг.  Өмнөговь аймгийн Ханбогд сумын Номгон багийн нутаг дахь Цагаан хадны гаалийн хяналтын бүсийн үйлчилгээ үзүүлэгчийг сонгон шалгаруулалтанд ялсан "Говь Таур" компанийн захирал Д.Уянга нь Ерөнхий сайд Н.Алтанхуягийн төрсөн эгчийнх нь охин юм.
 
Хоёр. Д.Уянга нь "Говь Таур" компанийг худалдаж авсан бөгөөд ганцхан өдрийн дотор дотоод аудитын компаниар үнэлүүлсэн байна.

Гурав. Ингэж үнэлүүлэхдээ компанийн эд хөрөнгийг газар дээр нь очиж бодитоор үнэлүүлээгүй бөгөөд тэрбум төгрөгийн хөрөнгөтэй гэж шууд бичүүлж авчээ. Тендерийн шалгуурт оролцогч компани нь нэг тэрбумаас доошгүй хөрөнгөтэй байх шалгуурыг тавьсан тул энэ шалгуурт тэнцэх гэж зориудаар хөрөнгө бий болгосон нь шалгалтын явцад илэрчээ.

Дөрөв. Тендерийн шалгуурт мөн сүүлийн таван жилийн хугацаанд 1 тэрбум 800 мянган төгрөгөөс доошгүй хэмжээгээр үнэлэгдэх ажил хийсэн байх ёстой гэсэн шалгуур байжээ. Д.Уянгын шинэхэн компанид энэ шалгуур байгаагүй ч тендерт тэнцсэн.

Тав. Харин Татварын газарт үүнээс эсрэгээр үйл ажиллагааны алдагдалтай гэсэн тайланг гаргаж өгсөн байдаг.

Зургаа. Мөн Гаалийн хяналтын бүсийн үйлчилгээг үзүүлэхийн тулд зайлшгүй Гаалийн хяналтын бүсэд үйл ажиллагаа явуулах нөхцлийг бүрдүүлсэн газрыг эзэмшиж  байх ёстой аж Гэтэл тендерийн сонгон шалгаруулалтыг 10 аж ахуйн нэгж саналаа өгсний 8 нь ийм зөвшөөрөлтэй газаргүй байжээ. Өөрөөр хэлбэл анхнаасаа найман компани уг тендерт шалгарахгүй нь тодорхой байжээ. Ингээд үлдсэн хоёр компанийн нэг болох "Говь таур" ялагч болжээ.

Энэ мэт баримтууд одоогоор илрээд байгаа бөгөөд хэрэв прокурорын газраас АТГ-ын дэлгэсэн дээрх баримтуудыг "но"-гүй гэж үзэхгүй л бол цаашаа хэнтэй ч холбогдож, хаашаа ч эргэж болохоор том хэрэг бололтой. Тухайлбал тендерийн шалгуур хангаагүй нь илт байхад ялуулсан тендерийн үнэлгээний хороонд хэн хэн байв? гэдэг хамгийн түрүүнд анхаарал татаж байна.