Монгол Улс, Бүгд Найрамдах Энэтхэг улсын зэвсэгт хүчний хамтарсан “Нүүдэлчин Заан 2013” хээрийн сургалт, дадлагын ес дэх удаагийн нээлтийн ажиллагаа зургадугаар сарын 13-нд Хужирбулан дахь Тусгай хүчний сургалтын төвийн жагсаалын талбайд боллоо.

Нээлтийн ёслолд Монголын талаас Ерөнхийлөгчийн Тамгын газрын дарга П.Цагаан, БХЯ-ны Төрийн нарийн бичгийн дарга, хошууч генерал З.Болдбаатар, ЗХЖШ-ын дарга, дэслэгч генерал Ц.Бямбажав, албаны бусад хүмүүс болон Энэтхэгийн талаас БНЭУ-аас Монгол Улсад суугаа Онц бөгөөд Бүрэн Эрхт Элчин сайд ноён Сатбир Сингх, БНЭУ-ын ЭСЯ-ны хоёрдугаар нарийн бичгийн дарга Шайлеш Лахтакиа, БНЭУ-ын ЭСЯ-ны цэргийн Атташе, хурандаа И.С Самуэль нар оролцов.
Монголчууд эртнээс Жагарын орон гэж ном судартаа хүндэтгэлтэй нэрлэж,найрсаг сайн харилцаатай явж ирсэн БНЭУ болон манай улсын Зэвсэгт хүчний хоорондын хамтын ажиллагаа сүүлийн жилүүдэд амжилттай өргөжин хөгжиж байна.

Монгол Улсын Ерөнхийлөгч,Зэвсэгт хүчний Ерөнхий командлагч Ц.Элбэгдорж Бүгд Найрамдах Энэтхэг улсын Ерөнхийлөгч,эрхэмсэг хатагтай Пратиба Дэвинсингх Патилын урилгаар 2009 оны есдүгээр сард Энэтхэг улсад анхны төрийн айлчлалаа хийж байв. Үүний дараа 2011 оны долдугаар сард Монгол Улсын Ерөнхийлөгч Ц.Элбэгдоржийн урилгаар Бүгд Найрамдах Энэтхэг улсын Ерөнхийлөгч, эрхэмсэг хатагтай Пратиба Дэвинсингх Патил, түүний нөхөр Девисингх Рамсингх Шекхават нар Монгол Улсад төрийн айлчлал хийсэн билээ.

Ази тивийн нөлөө бүхий томоохон гүрэн болох БНЭУ-тай хамтран зэвсэгт хүчний хамтарсан сургалт, дадлагыг уламжлал болгон хийснээр хоёр орны хооронд цэргийн итгэлцлийг бэхжүүлэх, харилцан туршлага солилцох, бүс нутгийн аюулгүй байдлыг бататгахад чухал ач холбогдолтой гэж үздэг.

Энэхүү уламжлал болсон хээрийн сургалт, дадлагын үеэр хоёр улсын тусгай хүчний цэргийн албан хаагчид энхийг сахиулах, терроризмтай тэмцэх чиглэлээр харилцан туршлага солилцож, мэдлэг чадвараа ахиулах юм.