Д.Цогтбаатарын эхнэр яагаад “ноцтой” баримт дэлгэсэнгүй вэ?
ТЕГ-ын Сөрөх тагнуулын газрын дарга Д.Цогтбаатарын цагдан хорих хугацаа энэ сарын 17-нд дуусах байсан. Харин энэ өдөр түүнийг суллахгүй бол эхнэр нь 18-нд буюу өчигдөр ноцтой баримтуудыг дэлгэнэ гэдгээ мэдэгдэж, хэвлэлийн хурал хүртэл хийсэн. Гэтэл нөхрийнх нь цагдан хорих хугацааг сунгаж, дахин хорьж эхэлсэн. Гэтэл ноцтой баримт дэлгэнэ гэсэн эхнэр нь хэвлэлийн хурал хийх бүү хэл утсаа ч авахгүй “мурив”.  Тэгэхээр Д.Цогтбаатар хурандаагийн эхнэр тухайн үед хуулийнханыг айлгаж худал мэдээлэл тараасан уу, эсвэл ноцтой баримтад холбоотой хүмүүс нь түүнийг дарамталж болиулав уу? гэдэг асуулт гарч ирэв.  Сүржин мэдэгдэл хийж, ноцтой баримт дэлгэнэ гээд байсан хүн өнөөдрийг хүртэл яагаад таг чиг болов. Эсвэл түүнд дэлгэх нууц баримтууд байхгүй байсан юм болов уу гэдэг дээр олон түмэн гайхширч байна.

Ямартаа ч өчигдөр Д.Цогтбаатарын шинэхэн өмгөөлөгч Г.Наранбаатар цагдан хорих хугацааг сунгасан явдалыг эсэргүүцэж, Чингэлтэй дүүргийн Ерөнхий шүүгчид гомдол гаргаад байгаа юм.

Анх Д.Цогтбаатарын эхнэр Ч.Мандах хэвлэлийн хурал хийж байхдаа, “миний нөхрийг одоо болтол надтай уулзуулаагүй, гэрээс нь хувцсыг нь хүртэл солиулалгүй авч явж, хорьсон. Мөн түүнийг гүтгэж байна. Хууль бусаар ингэж гүтгэж, хорих явдал цааш үргэлжилвэл би зарим нэг баримтуудыг дэлгэнэ. Энэ бол миний нөхрийг албан тушаалаас нь зайлуулах гэсэн хэсэг бүлэг хүмүүсийг зорилготой ажиллагаа” гэж мэдэгдэж байсан.

Герман иргэнийг манай улсад байхад Д.Цогтбаатар Москвод амьдарч байсан гэв
Д.Цогтбаатар хурандааг ХБНГУ-ын иргэн алга болсон хэрэгт шалгаж байгаа гэх хуулийнхан мэдэгдсэн. Тэгвэл Ч.Мандахын хэлж буйгаар “Монголд найман жилийн өмнө буюу 2005 онд гадаадын иргэн алга болсон юм билээ. Түүнд л манай нөхрийг холбогдуулан шалгаж байгаа гэсэн. Яг тэр цаг үед нь манай нөхөр Москвад Холбооны аюулгүй байдлын академид сурч байсан болохоор манайх гэр бүлээрээ тэнд амьдарч байсан. Үүнийг гэрчлэх дөч тавин хүн бий. Би нэрсийг нь мөрдөн байцаагчид нь гаргаж өгсөн” хэмээж байв. Тэгэхээр гадаад иргэний алга болсон хэрэгт сэжиглэгдэж байгаа гэх Д.Цогтбаатар нь тухайн үед гэр бүлийн хамт Москвод амьдарч байсан гэж эхнэр нь гэрчлээд байгаа. Ямартаа ч энэ хэрэг их л ноцтой болоод хуулийнхан цагдан хорих хугацааг нь сунгаж, ар гэрийнхэнтэй нь хүртэл уулзуулаагүй байгаа биз ээ.

Түүнчлэн Д.Цогтбаатарыг шалгахаар Германаас хоёр мөрдөн байцаагч ирсэн гээд бодохоор их л том хэрэгт хурандаа Д.Цогтбаатар орооцолдсон нь дамжиггүй. Өдгөө хамтарч ажиллахаар ирсэн хоёр мөрдөн байцаагч хаана юу хийж байгаа ч нь нууц хэвээр. Хэргийн мөрдөн байцаалт үргэлжилсээр...

Алга болсон герман эрийн монгол амрагийн сураг гараагүй л байна
Алга болсон гэх германы иргэн М.Л.Клойбер-ийг монголд “баян хүн” болж амьдарч байхад нь түүнтэй бараг гэр бүл зохиох дээрээ тулж байсан гэх Ё.Гантуяаг өдгөө Герман даяар эрэн сурвалжилж байна. Бас монголд. Герман эртэй хамт зугтсан уу, эсвэл овоо хэдэн төгрөгтэй болчихоод гадаадаар аялж, зугаалж яваа юу? гэдэг асуулт бас нууц хэвээр. Ямартаа ч германчууд тэр хоёрыг олж өгсөн хүнд 20, 20 мянган еврогтийн урамшуулал олгоно гэжээ.