УИХ-ын гишүүн Ё.Отгонбаярыг авлига авах гэж сүрдүүлсэн хэмээн хуулийн байгууллагад гомдол гаргасан Х.Цогнойжамц хил гарах гэж буй тухай мэдээлэл ирлээ. Тэрбээр УИХ-ын гишүүн Ё.Отгонбаярыг сайд байхдаа мөнгө өгөхгүй бол барьсан барилгыг чинь хүлээж авахгүй гэж сүрдүүлсэн, хүмүүсээр зодуулсан гэж гомдол гаргасан. Ё.Отгонбаяр гишүүн үүнээс болж УИХ-ын гишүүний бүрэн эрхээ хасуулж, суудлаасаа салж ч магадгүй эгзэгтэй үед ирээд байгаа билээ. Тэрбээр өөрийг нь авлига авах гэж бусдыг сүрдүүлсэн, мөн эхнэр нь их хэмжээний мөнгө угаасан хэрэгт холбогдсон нь цаанаа улс төрийн явуулга хэмээн мэдэгдэж байгаа. Харин үүнийг улс төр үү, угаасаа Ё.Отгонбаярын буруу юу гэдгийг олон нийтэд ил болгох нь “хэргийн эзэн, хэнгэргийн дохиур” Х.Цогнойжамц юм.

    Тэрбээр “Тавин лан” гэх барилгын компанитай бөгөөд Ё.Отгонбаярыг БСШУ-ны сайдаар ажиллаж байх үед 119-р сургуулийн барилгыг эхлүүлжээ. Гэсэн ч авлига өгөхгүй бол барилгыг нь хүлээж авахгүй гэж Ё.Отгонбаяр гүрийж, мөнгө нэхсэн гэж мэдүүлээд байгаа юм. Яг Ерөнхийлөгчийн сонгууль ид өрнөж байх үед МАН-ын цөөхөн нэр хүндтэй гишүүдийн нэгийг өндрөөс “унагаж” орхисон түүнийг чухам хэн бэ гэдгийг олон нийт сонирхож байгаа. Х.Цогнойжамц нь Аймгийн алдарт уяач цолтой, улс бүсийн наадмын нэг түрүү, таван айргийг авч байжээ. Мөн 119-р сургуулийн барилгаас өмнө хэд хэдэн ажил гүйцэтгэсэн дунд зэргийн бизнесмен эр.

   Ирэх долоо хоногт Ерөнхийлөгчийн сонгууль дуусмагц УИХ-ын чуулганаар юун түрүүн Ё.Отгонбаяр гишүүний бүрэн эрхийг түдгэлзүүлэх асуудлыг хэлэлцэж магадгүй гэж эх сурвалжууд мэдээлж байгаа. Одоо МАН-ынхан нэг гишүүний суудлаа АН-д алдаж магадгүй эгзэгтэй байдалд орж, Ё.Отгонбаярынх гэдэг айлд яаж ч магадгүй том асуудалд ороод байна.Гэтэл хэргийг анх өдүүлсэн Х.Цогнойжамц мэдүүлсэн гомдлынхоо хариуг үзэлгүй гадагш явах гэж буй нь олон хүний сонирхлыг татахаас гадна асуулт үлдээж байна.Харин Х.Цогнойжамц энэ талаар “Хил гарах гээд Замын-Үүдэд байна. Та нарт ямар нэгэн тайлбар өгөх шаардлагагүй, Болдог юм болоод л өнгөрнө биз" гэжээ. Тэрбээр улс даяар шуугиан дэгдээсэн том хэргийн эцсийг үзэхгүй “Болдог юм болоод өнгөрнө” хэмээж буй нь гайхалд төрүүлмээр. Түүний ард асуудлыг зохицуулах том фронт байгаа болоод тэр үү, эсвэл өөр асуудал байна уу? гэдэг олны анхаарлыг татаж эхэллээ.