Манай албан тушаалтнууд газрын наймаа хийхдээ тун гаршаад байгаа. Сүүлдээ бүр Засгийн газрын мэдлийн объект руу хүртэл ичгүүр сонжуургүй дайрч, энд тэндээс нь эмтлээд зарчихсан байхыг яана. Жишээ нь “Төр засгийн үйлчилгээний авто бааз”-ын газраас энд тэндээс нь өмлөж аваад зарчихсан болох нь тогтоогдоод байгаа. Энэ юу ч биш. Зарим пүүс, компанийн хувьчилж авсан объектын газрыг эрх мэдэлтэнүүд өөр компанид давхар зарж бөөн будлиан хутгаж орхисон байхыг яана. Жишээ нь “Гурван гол” компаний дуудлага худалдаагаар худалдаж авсан (хуучнаар "Үзэсгэлэн яармаг" УҮГазар) буюу “Сарны титэм”-ийн зарим газраас “Тавин лан” хэмээх компанид эмтлээд зарчихсан байх ажээ.

    Үүнээс болж 2007 оноос өнөөг хүртэл 19 удаа шүүх хурал болж, Нийслэлийн болон Улсын дээд шүүх асуудал нь тун доторхой хэрэг дээр мэдэн будилж, баахан бичиг цаас ийш тийш нь илгээсэн байх жишээтэй. Хэргийн байдлаас товч танилцуулбаас: Монгол Улсын Засгийн газрын 1997 оны 75 тоот, Төрийн өмчийн хорооны 1997 оны 116 тоот тогтоолоор нийтийн дуудлага худалдаагаар худалдахаар шийдвэрлэсний дагуу 1997.06.11-ний өдрийн нийтийн дуудлага худалдаагаар “Үзэсгэлэн яармаг” Улсын үйлдвэрийн газар нь "Гурван гол" ХХК-д 603.100.000 төгрөгөөр зарагджээ. Улмаар 2000 онд өөрчлөн зохион байгуулагдаж, өнөөдрийн байдлаар зургаан гишүүнтэй "Сарны титэм үзэсгэлэн" ХХК нэртэйгээр үйл ажиллагаагаа явуулж байна.

   "Үзэсгэлэн яармаг" компани /УҮГ-ын хувьчлалын тухай танилцуулга, схем зураг, 1997 оны 06 дугаар сарын 11-ний өдрийн 41 тоот Худалдах, худалдан авах гэрээ, 1997 оны 06 дугаар сарын 24-ний өдриин Эд хөрөнгө хүлээлцсэн акт, 1997 оны 06 дугаар сарын 28-ны өдрийн 00109 дугаар Өмчлөгчийн эрхийн гэрчилгээ зэрэгт зааснаар "Үзэсгэлэн яармаг" компанийн хувьчлагдах хөрөнгийн цогцолборт нийт 28 ширхэг обьект, үүний дотор 187.95 м2 агуулах, түүний гадна талын хашаа хамрагдан хувьчлагджээ. Гэтэл дээрх агуулахын барилгын өмчлөх эрх, түүний доорх газрын эзэмшил тус компанид шилжиж ирсэнгүй. Ингэж ирүүлээгүйн учир нь өөр компанид давхар зарах далд санаа агуулж байсан бололтой.  Жишээ нь дээрхи агуулахын газрыг Нийслэлийн Засаг даргын 2006 оны 07-р сарын 28-ны өдрийн 363 тоот "Газар эзэмшүүлэх, ашиглуулах эрхийг баталгаажуулах тухай" захирамжаар орон сууц, үйлчилгээний зориулалтаар 1200 м2 газар эзэмших, ашиглах зөвшөөрлийг "Монгол Ньюс" ХХК-д тус компаний хувьчлагдсан хөрөнгийн цогцолборт хамрагдсан обьекттой давхардуулан олгож тун бүдүүн зүрх гаргасан байхыг яана. Давхардуулан олгосон Нийслэлийн Засаг даргын 2006 оны 07 дугаар сарын 28-ны өдрийн 363 тоот "Газар эзэмшүүлэх, ашиглуулах эрхийг баталгаажуулах тухай" захирамжийн "Монгол Нюс" ХХК-д холбогдох заалтыг хүчингүй болгуулахаар Нийслэлийн захиргааны хэргийн шүүхэд хандсан боловч УДШ-ийн 2007 оны 11 дүгээр сарын 27-ний өдрийн 115 тоот тогтоолоор агуулахын барилгын өмчлөх болон түүний доорх газрын эзэмших эрхийг баталгаажуулаагүй байна гэдэг үндэслэлээр нэхэмжлэлийг хэрэгсэхгүй болгож шийдвэрлэжээ. Өмчлөх эрхээ баталгаажуулахаар Эд хөрөнгийн эрхийн бүртгэлийн газарт удаа дараа хандсан боловч өмчлөх эрхтэйг нотлох хангалттай баримтгүй, доорх газар эзэмшлийн асуудлыг шийдээгүй гэх мэт шалтаг шалтгаанаар баталгаажуулж өгсөнгүй. Иймд "Сарны титэм үзэсгэлэн" ХХК-ийг СБД-ийн 1 дүгээр хорооны нутаг дэвсгэрт байрлах 187.95 м.кв талбай бүхий хуучнаар "Үзэсгэлэн яармаг"" УҮГазрын агуулахын барилгын өмчлөгчөөр тогтоож өгөхийг Сүхбаатар дүүргийн шүүхээс хүсчээ.

    Шүүхийн тогтоол яаж гарсаныг өгүүлбээс:  
“...Иргэний хуулийн 202 дугаар зүйлийн 1 дэх хэсэгт зааснаар “Сарны титэм үзэсгэлэн” ХХК-ийг Сүхбаатар дүүргийн 1 дүгээр хорооны нутаг дэвсгэрт байрлах, 187,95 мкв талбай бүхий хуучнаар “Үзэсгэлэн яармаг” УҮГ-ын агуулахын барилгын өмчлөгч болохыг тогтоосугай. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, 56 дугаар зүйлийн 56.1, Улсын тэмдэгтийн хураамжийн тухай хуулийн 7 дугаар зүйлийн 7.1.2 дэх хэсэгт зааснаар нэхэмжлэгч “Сарны титэм үзэсгэлэн” ХХК-ийн улсын тэмдэгтийн хураамжид төлсөн 335,795 төгрөгийг улсын орлогод хэвээр үлдээж, хариуцагч Төрийн өмчийн хорооноос 335,795 төгрөгийг гаргуулж “Сарны титэм үзэсгэлэн” ХХК-д олгосугай” хэмээжээ. Гэтэл “Тавин лан” компани энэхүү шийдвэрийг эсэргүүцэж Улсын дээд шүүхэд давж заалдсан байх жишээтэй. Ингэснээр шүүхийнхэн болон газрын албаныхан авч ч болохгүй, хаяж ч болохгүй ацан шалаанд орж хэсэг тээнэгэлзэж байснаа “Тавин лан” компаний талд ашигтай шийдвэр гаргажээ. Энэ нь “Сарны титэм”-ийн хувьчилж авсан агуулахыг нураагаад газрыг нь “Тавин лан” компанид өгөх шийдвэр гаргажээ. Үүний улмаас Шүүхийн шийдвэр гүйцэтгэх газрын ажилтанууд “Сарны титэм”-ийн тэртээ 1997 онд өндөр үнээр хувьчилж авсан агуулахыг нураахаар сандаргаж эхлээд байгаа юм байна. Жинхэнэ шударга бус явдал гэж үүнийг л хэлэх болов уу.