Олон мянган залуусыг эгнээндээ нэгтгэж, тэднийг сайн сайхан зүйлд уриалан дуудаж байгаа “Нөлөөллөөс дээгүүрт” аян үргэлжилсээр байна. Өдөр бүр 2000-3000 хүнээр бүл нэмсээр байгаа энэ аян өнөөдрийн байдлаар 16 мянга хол давсан дэмжигчидтэй болжээ.
   Аянд нэгдэж, идэвхтэй оролцож буй залуусын төлөөлөлтэй уулзаж, аяныг дэмжиж буй шалтгаан, зорилгынх нь талаар цөөн хором ярилцлаа.

Тэднийг П.Бямбажаргал, Э.Энхжаргал гэдэг бөгөөд хоёулаа нэг сургуулийн оюутнууд юм байна.

-“ Нөлөөллөөс дээгүүрт” аянд нэгдэх болсон шалтгаанаасаа хуваалцахгүй юу?
 -П.Бямбажаргал “Татар” хамтлагийн санаачлан зохион байгуулж байгаа аяныг дэмжих олон шалтгаан байна. Сүүлийн үед манай залуус бусдын муу нөлөөнд их автдаг болсон байна л даа. Залуус архи,  тамхи гэх мэт муу муухай зүйлд донтохгүй, энэ бүхнээс дээгүүр, нөлөөнд нь бүү автаасай гэж хүсч байгаа учраас аянд нэгдсэн. Энэ аянаар дамжуулан бид өөрсдөө хичээвэл бүгдийг хийж чадна гэдэг үгийг залуучуудад ойлгуулж чадах юм шиг санагдаж байна.  Өнөөгийн нийгэмд бусдын муу нөлөөллөөс дээгүүрт амьдрах гэдэг утгаар нь би их дэмжиж байгаа.

Э.Энхжаргал: Аяныг дэмжих болсон шалтгаанаас өмнө нөлөөлөл гэдэг үгийг тайлбарлах хэрэгтэй байх л даа. Ер нь нөлөөлөл гэдэг бол хэн нэгэн хүн сайн, муу ямар ч байдлаар хамаагүй тухайн хүний шийдвэрт шууд болон шууд бусаар хамаатай байдаг. Энийг л нөлөөлөл гээд байгаа юм. Сайн зүйлд бусдыг уриалан дуудаж сайнаар нөлөөлнө гэдэг бол сайхан. Гэвч бусдын муу нөлөөнд автах үзэгдэл өнөөгийн залууст хамгийн түгээмэл тохиолддог зүйл болсон байна. Тиймээс тус аянаар дамжуулан залуусыг муу нөлөөллөөс хол байлгах, сайн нөлөөллийг бий болгоход өөрийн чадах хэрээр хувь нэмэр оруулах зорилготойгоор аянд нэгдсэн.

-Өнөөгийн нийгэмд архи гэгч зүйл залуучуудыг муу муухай руу түлхэж байна гэж хэлж болохоор байна л даа. Энэ талаар ямар бодолтой байна вэ?

-П.Бямбажаргал: Миний бодлоор залуу хүмүүст хийе, бүтээе гэсэн хүсэл эрмэлзэл байгаа боловч нөхцөл бололцоо нь дутмаг байна. Тийм болохоор залуучууд бусдын муу нөлөөнд их автдаг болчихсон  юмуу даа гэж харагддаг. Дээрээс нь өнгө, мөнгө хөөж, нэг нэгнийгээ даган дуурайгсад олширсон байна. Мөн өөрийн гэсэн үзэл бодолгүй болсон байгаа нь их эмгэнэлтэй санагддаг. Муу зүйл гэдгийг мэдсээр байж хүнийг даган дуурайх хүсэлдээ хөтлөгдөн нөлөөнд нь автдаг. Ийм л сонин нийгэм өнөөдөр бий болчихоод байна. Үүнийг өөрчлөх хэрэгтэй.

Э.Энхжаргал: Ер нь хүн өөрийгөө удирдах, авч явах, сайн сайхны төлөө аливаа зүйлд өөрийгөө бэлдэх, түүн рүү тэмүүлэх гэсэн зорилготой амьдардаг байх гэж би боддог л доо. Гэтэл өнөөгийн залуус маань маргааш ирээдүйгээ харах биш, өчигдөр өнөөдөртөө амьдарч, ямар ч зорилго тэмүүлэлгүй болчихож. Уг нь бол бид хийе, бүтээе гээд зүтгэвэл бүгдийг чадна. Тэр дундаа монгол залуучуудад их хүч байдаг. Тэрнийгээ л ашиглах хэрэгтэй гэж хэлмээр байна.

-Аяны зорилго маань өөрөө их гэгээлэг, сайхан шүү дээ. Харин чиний зорилго энэ аянтай хэр нийцэж байна?

-П.Бямбажаргал: Надад “Нөлөөллөөс дээгүүрт” аяны зорилго нь их таалагдсан учраас би нэгдсэн. Магадгүй би гурван жилийн дараа архигүй Монголыг, бусдыг даган дуурайдаггүй, нэг нэгнийхээ үгэнд автдаггүй залуусыг харж болно. Би архигүй Монголыг харахыг хүсэж байгаа учраас аянд нэгдсэн. Бас зөвхөн Улаанбаатар хотод өрнөөд байгаа энэ аян Монгол орныг бүрэн хамраасай гэж хүсч байна. Удахгүй залуучуудын санаачилсан хамгийн том хөдөлгөөн болж Монгол орны өнцөг булан бүрт байгаа залууст хүрнэ гэж итгэж байгаа. Бас залуучуудыг өөрийнхөө төлөө, нийгмийнхээ сайн сайхны төлөө энэ аянд идэвхтэй нэгдээрэй гэж хэлмээр байна.

Э.Энхжаргал: Гэрэлтэй Монголыг хүсдэг болохоор миний зорилготой яг таарч байгаа. Монголын ирээдүй болсон залуус маань өөрийнхөө амьдралын төлөө, өөрийнхөө сайн сайхны төлөө муу бүхнийг ухамсарлаад энэ аянд идэвхтэй нэгдээсэй гэж хүсэх байна даа.

- Ярилцсанд баярлалаа