Манай урлагийнхан дунд бага, дунд сургуульдаа олон удаа шилжиж, хэд хэдэн сургуулийн нүүрийг үзсэн нь цөөнгүй. Тухайлбал, реппер Gee-гээс эхлээд дуучин Э.Номин хүртэл цөөнгүй сургуулийн босгыг алхжээ. Э.Номингийн хувьд манай уншигчид  “Хайрын охин”, “Бодол”, “Хайр минь юм уу” дуугаар нь сайн таних бизээ. Тэрээр нийслэлийн 61 дүгээр цэцэрлэгт хүмүүжсэн. Дараа нь орос 14 дүгээр сургуульд гуравдугаар анги хүртэл сурсан. Тэгээд Швейцарь улс руу явж тэндээ зургадугаар анги хүртэл Женев хотын “Ecole de Bellevue”, “Colleges Des Colombieres” сургуульд сурсан байна. Харин долдугаар ангидаа эх орондоо эргэн ирж арван жилээ “Эрэл” дунд сургуульд суралцаж төгссөн. Их сургуулиа Энэтхэгийн Дэли хот дахь “Jawaharlal Nehru University”-ийг бакалавраар төгсчээ.