“Дээлтэй Монгол Наадам–2013” маргааш буюу долоодугаар сарын 13-ны өдөр Сүхбаатарын талбайд 12.00 цагт эхэлнэ.

Энэ удаагийн наадамд  зургаан төрлөөр “Шилдэг оролцогч” шалгаруулах бөгөөд үүнд:

-Хамгийн сайхан үндэсний дээл, хувцастай нэг эрэгтэй, нэг эмэгтэй хүүхэд /3-10 насны хүүхдүүдийн дунд/,
-Нийтийн бүжгийн шилдэг хос-1,
-Хамгийн сайхан дээлтэй хос-1,
-Хамт олноороо идэвхитэй оролцсон байгууллага-1,
-Монгол үндэсний дээлтэй гадаадын шилдэг оролцогч-1,
-Шилдэг зохион байгуулалтай, идэвхитэй оролцсон нэг дүүргийг тус тус шалгаруулах юм.

Өнөөдрийн байдлаар 52 хос, есөн байгууллага, гурваас дээш насны 65 хүүхэд, нийтийн бүжигт найман хос, гадаадын таван хос бүртгүүлээд байгаа аж.

Шалгаруулалтад оролцох хүсэлтэй иргэдийг маргааш ч арга хэмжээ эхлэхээс өмнө бүртгэх боломжтой бөгөөд зохион байгуулагчдын зүгээс бүртгүүлэх иргэдэд  хоёр хувь цээж зураг, иргэний үнэмлэх, жолооны үнэмлэх, төрсний гэрчилгээ зэрэг бичиг баримттайгаа ирэхийг сануулж байна. Холбогдох утас 70108687, 327820

Мөн тус арга хэмжээний “Дээлтэй Монгол” парад жагсаалд оролцогчдын байрлалуудыг дэлгэрэнгүй танилцуулж байна.

Долоодугаар сарын 13-ны 12.00  цагаас “Дээлтэй Монгол” парад жагсаал эхлэх бөгөөд доорх байрлалд 10.00 цагаас парад жагсаалд оролцогчдыг байрлуулж бүртгэнэ.

1. Дуурь бүжгийн эрдмийн театрын урд талд “Монгол Костюмс” ХХК, “Торго” салон, ДБЭТ, Түмэн эх чуулгын жүжигчид, Улсын цирк, Хөгсүү чуулгын 999 бие биелгээчид, Ноён зууч 1950-ын хамт олон, тусгайлан оролцох бусад байгууллагууд.
2. Улаанбаатар зочид буудлын урд талбайд Баянзүрх дүүргийн парад жагсаалд оролцогчид
3. Спортын төв ордны зүүн талд (гол хаалга тал) Багахангай, Налайх, Хан-Уул дүүргийн парад жагсаалд оролцогчид
4.  Ерөнхий сайд Амарын гудамжинд Сонгинохайрхан дүүргийн парад жагсаалд оролцогчид
5.  Гутлын 22-р дэлгүүр буюу Өргөө зочид буудлын ард талд Баянгол дүүргийн парад жагсаалд оролцогчид
6. Чингэлтэй, Сүхбаатар дүүргийн парад жагсаалд оролцогчид дүүргийнхээ урд  байрлалаа эзэлж бүртгүүлнэ.

Эдгээр парад жагсаалд оролцогчдыг Багахангай дүүргээс Сүхбаатар дүүрэг хүртэл нар зөв тойрсон байдлаар оролцуулах ба парад жагсаалыг Дуурь бүжгийн эрдмийн театр-Монголын Хөрөнгийн бирж–Монголын үйлдвэрчний эвлэлийн холбоодын байр–Төрийн ордны өмнүүр орж ирэхээр зохицуулж байгаа юм.

Наадамчдад зориулан 2000 суудал бэлтгэх бөгөөд 11.00 цагаас эхлэн зочид суудлаа эзлэх боломжтой юм байна