Үндэсний их баяр наадмын өдрүүдээр хурдан морины уралдааны үеэр 31 хүүхэд мориноос унаж бэртжээ. Тэгвэл эдгээр хүүхдүүдээс нэг хүүхэд нас барсан бол таван хүүхэд ГССҮТ-д хэвтэн эмчлүүлж байгаа юм байна.

Нас барсан хүүхдийн талаар  Хүүхэд хамгаалал үйлчилгээний газрын мэргэжилтэн Г.Ойнбаяраас тодруулахад, "Төв аймгийн Жаргалант сумын өдөрлөгийн үеэр нэг хүүхэд нас барсан байгаа. Энэ бол цэвэр зохион байгуулалтгүй байдлаас болж гарсан осол. Нас барсан хүүхдийн хувьд хамгаалалтын хувцасгүй байсан. Өөрөөр хэлбэл аюулгүй байдлыг бүрэн хангаж чадаагүй уралдаан байсан. Одоогоор хариуцлага алдсан зохион байгуулагч, уяач зэрэгт хариуцлагыг тооцохоор Төв аймгийн хүүхдийн төлөө газрын мэргэжилтнүүд ажиллаж байгаа. Хамгийн гол нь нас барсан хүүхдийг хамгаалалтын малгай, хувцас өмсүүлээгүй уралдуулсан. Хүүхдийн хувьд эмнэлэгт хүргэгдэж байх замдаа нас барсан" гэв.
Өнөөдрийн байдлаар таван хүүхэд ГССЗҮТ-д хэвтэн эмчлүүлж байгаа юм байна. Ингээд уралдаанд ороод бэртэл авсан хүүхдүүдтэй уулзлаа.

-Аль аймгийн морин уралдаанд орж байгаад бэртсэн бэ?

-Би Увс аймгийн Өмнөговь сумынх, 15 настай. Сумынхаа наадамд уралдаж байгаад бэртчихсэн.

 

-Сумын чинь наадам хэзээ болсон бэ. Эмнэлэгт хэвтээд хэд хонож байна?

-Сумын наадам энэ сарын 8-нд болсон.  ГССҮТ-д энэ сарын 10-нд ирсэн.

 -Ямар морь унасан бэ?

-Даага.

 -Хэр зэрэг бэртэл авсан байна?

-Гар их өвдөж байна. Ярихад хүндрэлтэй байна.  Баасан гарагт гарандаа хагалгаа хийлгэнэ.

 -Хэн гэдэг уяачийн морийг унасан бэ. Эмчилгээний зардлаа гаргуулсан уу?

-Нутгийнхаа Н.Шовоо гэдэг хүний даагыг унасан. Эмчилгээний бүх зардлаа гаргуулсан. Хэдэн төгрөг өгснийг аав мэднэ. Аав маань одоогоор байхгүй байна.

    Найман настай Н.Амгаланбаатар: Мориноосоо буусан чинь морь тонгороод өшиглөчихсөн

-Аль аймгийн морин уралдаанд оролцож байгаад бэртэв. Хэдэн настай вэ?

-Би найман настай. Төв аймгийн наадамд оролцож байгаад бэртчихсэн. Би өөрөө Улаанбаатарынх. Уг нь миний даага айрагдсан.

-Тэгээд яагаад бэртчихсэн юм бэ?

-Мориноосоо буусан чинь морь тонгороод өшиглөчихсөн. Миний гар хугарсан.

-Хэдэн жил морь унаж байгаа юм?

-Хоёр жил унаж байна. Гэхдээ энэ жил л уралдаанд оролцсон.

Энэ жилийн улсын баяр наадмаар Цэнгэлдэх хүрээлэнд 3, Хүй долоон худагт 1 эрүүл мэндийн нэгдэл ажиллажээ. Улмаар Хүй долоон худагт 31 хүнд түргэн тусламжийн үйлчилгээ үзүүлсэн аж. Гэмтсэн хүмүүсийн ихэнх нь мориноос унаж бэртсэн хүүхдүүд байсан бөгөөд шуу, эгэмний хугаралтай байсан талаар холбогдох албаныхан ярьж байлаа.