Олимпийн наадмаас медаль хүртсэн Монголын тамирчид олимпийн таван цагирагийг эрхэмлэх болов. Дэлхийн бусад орнуудад ч гэсэн олимпийн медаль авсан тамирчид олимпийн таван цагирагийг эрхэмлэдэг түүхтэй.

Тэгвэл өнгөрсөн жилээс эхлэн олимпийн анхны аварга Н.Түвшинбаяр адуугаа олимпийн таван цагирагаар тамгалж эхэлсэн. Н.Түвшинбаярын аав улсын сайн малчин Найдан гуай ч гэсэн бусад хөвгүүдийн хамт шинээр гарсан унагануудаа олимпийн таван цагирагаар тамгалж  байна. Монголд ийм тамгатай адуу одоохондоо Булганы Сайхан суманд бий.

Харин олимпийн аварга Э.Бадар-Ууган энэ жилээс эхлэн хөөрөгнийхөө даалинг олимпийн таван цагирагаар гоёж эхэлжээ. Тэрээр өөрийн цэнхэр даалинг олимпийн эмблемийг зүү ороох хэлбэрээр хатгуулсан байна. Түүнээс өөр ийм даалинтай хүн Монголд бас л байхгүй биз.

Олимпийн мөнгөн медальт тамирчин П.Сэрдамба ширэн түрүүвчин дээрээ олимпийн таван цагирагийг урлуулжээ. Тэрээр аз одыг ивээж ирсэн таван цагирагийг хөрөнгө мөнгөтэй явахад бас туслана гэж билэгшээсэн сурагтай. Ийнхүү Монголын тамирчид ивээлээ өгсөн олимпийн таван цагирагийг өөрсдийн эдлэл хэрэглэл дээрээ нандигнан буулгаж, тахин шүтэх болжээ. Энэхүү таван цагираг нь таван тивийг төлөөлдөгөөс гадна эв нэгдэл, эрх тэгш байдлыг билэгддэг юм.