Энэ зуны хамгийн том шоу “Exotic Fashion Party-Show” “Мишээл экспо”-д маргааш оройн 20 цагт болох гэж байна. Шоу тоглолтонд дэлхийд хоёрт жагсдаг эмэгтэй дижи Da CANDY уригдан оролцож байгаа бөгөөд өнөөдөр энэ шоуны талаар зохион байгуулагчдын хамт мэдээлэл хийсэн юм. “Торго” загварын агентлагийн загварын болон циркийн үзүүлбэрүүд гээд олон сонирхолтой зүйлс шоуны хөтөлбөрт багтжээ. “Galaxy events”-ээс зохион байгуулж байгаа “Exotic Fashion Party- Show” нь үдэшлэг гэхээсээ илүү шоу арга хэмжээ болж байгаагаараа онцлогтой. Мөн шоунд DJ Gabriel, DJ Шоовий, DJ Баачка нар оролцоно. Тасалбарын хувьд 20 мянган төгрөг байгаа аж. Дэлхийн хамгийн "халуухан дижи" гэгддэг DJ Dа Candy-тэй хэдэн хором ярилцлаа.

-Манай улсад ирээд төрсөн сэтгэгдлээсээ бидэнтэй хуваалцахгүй юу?
-Сайн уу? Монголчууд аа. Та бүхэнд энэ өдрийн мэндийг хүргэе. Танай орон надад их таалагдаж байна. Маш сайхан байгальтай юм. Миний хамгийн их хүлээж байгаа зүйл нь маргааш болох шоу. Учир нь монгол залуучууд электро хөгжмийг яаж хүлээж авахыг харахыг хүсч байна. Тиймээс маргааш болох шоун дээр та бүхнийг хүрэлцэн ирнэ гэж найдаж байна. Надтай хамт цагийг сайхан өнгөрүүлнэ гэдэгт итгэлтэй байна.

-Та гадаадын ямар орнуудад тоглолтоо хийж байв?
-Европын бүх орноор явсан. Бас Монголоос гадна Азийн ихэнхи орнуудад очиж тоглож байсан. Цаашдаа Америк болон Латин Америкийн улсуудаар явж тоглох сонирхолтой байгаа.

-Электро хөгжим дотроо олон урсгалтай. Таны хувьд ямар урсгалаар тоглодог вэ?
-Би электро урсгалаар тоглох илүү дуртай. Мөн хаус урсгалаар тоглоно. Ер нь бүх урсгал чиглэлийг сонирхдог. Маргаашийн хувьд ихэвчлэн электро-хаус чиглэлээр тоглоно. Том хэмжээний шоу учир залуучуудад  таалагдах байх.

 -Та анх яагаад дижи болсон юм бэ?
-Би анх гурван гишүүнтэй хамтлагт байсан. Хамтлагт байхдаа би яагаад дижи болж болохгүй вэ гэж бодсон. Тэгээд л дижи болсон доо. Бас дижи хийх нь хамтлагт байснаасаа арай илүү мөнгө олдог. /инээв/  
-Ярилцсанд баярлалаа.