Хууль бусаар мод бэлтгэх гэмт хэрэг сүүлийн үед гаарч, энэ төрлийн аргаар ашиг орлого олох гэж улайран байгаль эхээ хайр найргүй сүйтгэх иргэдийн тоо үлэмж нэмэгдсэн. Мөн хулгайн модтой тэмцэхэд гар бие оролцон, идэвхтэй ажил зохион байгуулж байх учиртай аймаг, сумдын Засаг дарга,  Иргэдийн хурлын төлөөлөгч нар эсрэгээрээ зөвшөөрөлгүй мод бэлтгэгчдийг өөгшүүлсэн шийдвэр гаргаад сууж байдаг талаар ч иргэд шүүмжилсээр байна.

Сүүлийн үед л гэхэд нийслэл хотын ойролцоох амралт, зугаалгын газрууд хууль бусаар мод бэлтгэн хэрэглэж буйг цагдаагийн байгууллагаас мэдээллээ. Тухайлбал, Сонгинохайрхан дүүргийн нэгдүгээр хороо "Найрамдал" зусланд  зөвшөөрөлгүй мод бэлтгэсэн хэрэг гарсан. Улмаар Сонгинохайрхан дүүргийн хоёрдугаар хороонд оршин суух 44 настай эрэгтэй А гэгч нь "Бонго" маркийн автомашинаар зөвшөөрөлгүй мод бэлтгэн ачиж байсныг нь Сонгинохайрхан дүүргийн цагдаагийн нэгдүгээр хэлтэс шалгаж байгаа юм.

Мөн Баянгол дүүргийн 20 дугаар хороо "Хялгант" зах дээр зөвшөөрөлгүй мод ачсан хэргийг шалгаж байгаа. Тодруулбал, Сэлэнгэ аймаг Мандал сум Сансар баг гэх газар оршин суух 33 настай Ч гэгч нь гарал үүслийн бичиг баримтгүй "Зил 130" маркийн машинаар нойтон мод ачиж явсаныг нь Баянгол дүүргийн цагдаагийн хоёрдугаар хэлтэс шалгаж байна.

Тэгвэл энэхүү хууль бус мод бэлтгэх явдалд хяналт тавих эрх, үүрэг бүхий байгууллагын нэг Нийслэлийн мэргэжлийн хяналтын газрын Байгаль орчин, газрын албаны эх сурвалжаас хэдэн зүйлийг тодруулахад, "Модны хулгайг олж тогтоох, тэмцэх, илчлэх шалгалтууд хийгдэж байгаа. Бидний зүгээс илэрсэн зөрчлүүдэд тодорхой арга хэмжээнүүдийг тооцоод явж байна. Гэхдээ хулгай буюу эрүүгийн хэрэг гэдэг утгаараа  цагдаагийн байгууллага голлон анхаарал хандуулж ажиллаж байгаа. Цагдаагийн байгууллагын харьяа Байгаль орчны эсрэг гэмт хэрэгтэй тэмцэх хэлтэс байгуулагдсанаас хойш 100.000 төгрөгөөс дээш асуудлыг тэд хариуцаж шийдвэрлэдэг болсон. Байгаль орчин, ногоон хөгжлийн яам, Шударга өрсөлдөөн хэрэглэгчийн төлөө газраас гадна Нийслэлийн байгаль хамгаалах газар, мэргэжлийн хяналт, онцгой цагдаагийн байгууллага хамтарч ажилладаг.  Өөрөөр хэлбэл, эдгээр байгууллагууд хамтарч  нийслэлд үйл ажиллагаа явуулж буй мод, модон материалын үйлдвэрүүд, мөн мод, модон  материал худалдан борлуулдаг есөн захад гаралт үүслийн бичигтэй мод авч байгаа эсэхэд хяналт тавьж байна" гэв.

Ямартаа ч хулгай гэдэг үүднээс цагдаагийн байгууллага зөвшөөрөлгүй модны хулгайтай тэмцэх болсон аж. Тэгвэл зөвшөөрөлгүй мод бэлтгэсэн, гарал үүсэл тодорхойгүй мод нийлүүлэх зэрэг зөрчилд хэрхэн хариуцлага ноогдуулдагийг цагдаагийн байгууллагын албаны эх сурвалжаас асууж тодруулсан юм.

-Сүүлийн үед модны хулгай буурахгүй байгаа гэсэн. Тэгвэл зөвшөөрөлгүй мод бэлтгэсэн иргэдэд ямар хариуцлага тооцдог вэ?

- Хууль бус мод бэлтгэснээр хохирлыг төлж барагдуулаад зогсохгүй мод бэлтгэхэд ашигласан багаж хэрэгсэл, машин тэргээ хүртэл хураалгадаг. Мөн цаашлаад хоёроос дээш жилийн ял авдаг. Тиймээс иргэд зөвшөөрөлгүй мод бэлтгэснээр эд хөрөнгө, цаг хугацаагаараа хохирно гэдгийг анхаарах нь зүйтэй.  Хэрэв давтан хийвэл тав хүртэлх жилийн ял оноодог.

Тэгвэл хууль сөхвөл, Эрүүгийн хуулийн 211 дүгээр зүйлд 211 дүгээр зүйл нь энэ оны хоёрдугаар сард Эрүүгийн хуулийн нэмэлт өөрчлөлтөөр нэмэгдсэн бөгөөд "Зохих зөвшөөрөлгүй ойд мод бэлтгэсэн, тээвэрлэсэн, худалдсан, худалдан авсан, хадгалсан, боловсруулсан, хамгаалалтын болон ашиглалтын бүсийн ойд хуулиар хориглосон үйл ажиллагаа явуулснаас бага бус буюу үлэмж хэмжээний хохирол учирсан бол хөдөлмөрийн хөлсний доод хэмжээг 200-250 дахин нэмэгдүүлсэнтэй тэнцэх хэмжээний төгрөгөөр торгох, эсхүл гурван жил хүртэл хугацаагаар хорих ял шийтгэнэ" гэж заасан. Харин 211-2-т зааснаар энэ хэргийг олон удаа давтан, улсын тусгай хамгаалалттай газар нутагт үйлдсэн бол гурван сар хүртэл хугацаагаар баривчлах, эсхүл таван жил хүртэл хугацаагаар хорих ял шийтгэх аж.

Ой мод байгалийн нөхөн сэргээгддэг баялаг. Гагцхүү түүнийг шинжлэх ухааны үндэслэлтэйгээр зөв ашиглаж, хэрэглэх шаардлагатай байгаа юм. Нас бие гүйцсэн нэг модыг огтлоход дахин боловсорч гүйцэхэд 120-140 жилийн хугацаа шаардлагатай байдаг. Зуугаар тоологдох жилийн дараа сэргээгдэх ойн баялгийг ашиг хонжоо хайсан шунахайн сэдэлтээр хэдхэн хормын дотор хөрөөдөж, машин машинаар ачиж байгаад харамсахгүй байхын аргагүй юм.