Ойрын хэдэн жил номын дэлгүүрийн лангуун дээр үзэгдээгүй нөхөрсөг элэглэлийн шинэхэн ном уншигчдын гар дээр очжээ. "ТВ9" телевизийн нэвтрүүлгийн албаны сэтгүүлч О.Эрдэнбүрэнгийн "Зун шиг" инээд ном бидний эчнээ таньдаг олны танил эрхмүүдийн тухай нөхөрсөг, хөгжилтэй элэглэлүүдээр дүүрэн байна.  Ерөнхий сайд Н.Алтанхуяг, УИХ-ын гишүүн Ц.Нямдорж, С.Баярцогтоос эхлээд жүжигчин П.Эрдэнэзаан, "Киви" хамтлаг, топ мопель Э.Одгэрэлийн тухай хөгжилтэй мөртүүд багтжээ. Тухайлбал, Ерөнхий сайд Н.Алтанхуягт зориулж,

Алтанхуяг сайдын хүргэн болохыг хүсэгчид цугларав
Арван мянга хол давж шоргоолж шиг олшров
Аргаа барсан зарим нь Алтанхуягт захиа хүртэл илгээв
Азаа үзэхээр шийдэж гэрийнх нь гадна өлсч хонодог болов
Аминчлан гуйя хүргэнээ болгооч та минь
Арван долоон тэрбумын тендерт нэр холбогдож үзье
Амьд яваа насандаа ажиллаад олж чадахгүйгээс хойш
Алтанхуяг таньтай ойр байж их мөнгөний бараа харъя...
Бүр болохгүй гэвэл та минь намайг
Баруун юм уу, зүүн аймгийн Засаг дарга болгочих
Томилолтоор орон нутагт очиход чинь
Тосч угтах "Ланд 200"-тай болох гэсэн юм аа
Бас нэгэн зүйлийг танд захиж хэлэхэд
Бурхан Халдун ууланд дахиж аврихаар явахдаа
Төөрөх бэлтгэлээ эртнээс хангаж
Талх, хиам өвөртөлж яваарай өлсөнө шүү гэж
Таны хүргэн болохыг хүсэгчид сануулж байна гэжээ.

    Нөхөрсөг элэглэл бол шүлэг бичихээс ч хүнд төрөл гэж үздэг. Учир нь элэглэл чимх давс илүүдвэл доромжлол болж, чимх чихэр дутахад толгой холбосон өгүүлбэр болж орхидог. "Зун шиг инээд" нөхөрсөг элэглэлийн ном нь сэтгүүлч О.Эрдэнэбүрэнгийн анхны ном юм. Тэрбээр 2011 онд МҮОНРТ-ээс зохион байгуулсан "Шинэ цаг" яруу найргийн реалити шоунд оролцож шилдэг 30 залуу яруу найрагчийн нэгээр шалгарч байжээ.