"Олон овоот"-ын банк дампууруулдгаар нь бараг хүн бүр мэддэг боллоо. Ингэхэд "Олон овоот" гэж ямар орд вэ. Тус ордын тухай 24 баримтыг хүргэж байна.

1.    Тус орд газар нь Өмнөговь аймгийн Мандал-Овоо суманд бий.

2.    Энэ алтны орд газар нь ганц бус нийт 16 лицензээс бүрддэг байна. Гэвч нийт нөөц нь тун тодорхойгүй.

3. Манай улсын эрдэс баялгийн санд бүртгүүлж, гадны экспертүүдээр тодорхойлуулснаар 18.5 тонн алттай гэж үздэг ажээ.

4.    Энэ ордоос болж хамаг юмаа тавиад туучихсан гээд байгаа “Жаст”-ын Ш.Батхүү энэ тоонд л итгээд тус ордыг авч хөрөнгө оруулсан түүнийг бизнесмэн биш энгийн нэгэн болгосон гэж буй.

5.    Ш.Батхүүгээс өмнө тус ордын эзэн байсан Ц.Мянганбаяр 2009 онд хэвлэлд өгсөн ярилцлагадаа “Геологийн тогтоцоор “Олон Овоот”-ын ордын алтны нийт нөөц 100 тонн хүрнэ гэж Канадын компани дүгнэлт гаргасан” гэж ярьжээ.

6.    Тус ордыг ашиглах зөвшөөрлийг хамгийн анх 1997 оны 10 сарын 1-нд өгч байжээ. Мөн 2042 оны 10 сарын 15-ны өдөр хүртэл ашиглах зөвшөөрөлтэй талбай ч 16 лиценз дунд байна.

7.   Тус ордын “Овоот-1”, “Олон овоот”, “Гоёот улаан”, “Мөргөцөг уул”, “Бороодон”, “Хоримт”, “Авдрант”, “Хоромт”, “Хүрмэн толгой”, “Өлгий уул-1”, “Баруун овоо” зэрэг талбайн лицензийг “Зоос”, “Анод” хэмээх түүх болсон банкуудын барьцаанд тавьж тэднийг дампууруулахад хүргэжээ.

8.    Харин "Баян ширээ уул", "Авдрант 1", "Авдрант", "Хоримт" гэсэн сүүлийн дөрвөн лицензийг “Хадгаламж” банкинд барьцаанд тавьжээ.

9.    Энэ ордын лицензийг анх 1997 онд “Хотш” банкны нэр дээр авч байжээ.

10.    Үүний дараа “Бор хайрхан уул” гэдэг компанийнх байснаа “Монгол газар”-ын Ц.Мянганбаярт очиж сүүлдээ “Жаст”-д ирсэн тухай хэвлэлд бичсэн байна.

11.    “Монгол газар”-ын Ц.Мянганбаяр “Олон овоот”-ыг хамтарч эзэмших саналыг “Жаст”-ын Ш.Батхүүд 2006 онд тавьж байжээ. Асар их нөөцтэй хэмээсэн уг ордод “Жаст”-ыг татах гол зорилго нь алтны уурхайд хамгийн их хэрэгтэй дизель шатахууныхаа зардлыг даалгах байсан бололтой. Тиймээс хамтарсан компани байгуулахаар болж “Олон овоот гоулд” гэсэн компани мэндэлсэн гэнэ. Хамтарсан компанийн 60 хувь “Монгол газар”-ынх, үлдэх 40 хувь нь “Жаст” группийн мэдэлд байхаар гэрээ хийж байжээ.

12.    Харин одоо энэ орд Г.Алтан хатагтайн мэдлийнх.

13.    100, 25, 18.5 бүр 4 тонн алтны нөөцтэй гээд буй энэ ордыг эзэмшигч одоогоор 570 кг алт олборлоод байгаа нь үнэн аж.

14.    “Олон Овоот”-ын ордыг өмнө нь “Голдман сакс” хэмээх гаднын банкинд барьцаанд тавьснаар, манай “Зоос” банк дампуурч гадныханд алдахаа дөхөж байсан түүх бий.

15.    Гадныханд алдчихалгүй өөрсдөө авч үлдсэн ч лиценз нь банкнаас банк дамжин барьцаанд явсаар, алтаа олборлосон олборлоогүй хоёрын хооронд байсаар өнөөг хүрчээ.

16. “Алтжин”-ийн Г.Алтан хатагтайн гарт очсон тус ордын цаашдын хувь заяа хаашаа эргэхийг хүмүүс анхааралтай харж байна. Г.Алтан хатагтайн цаана АН-ын нэр бүхийн гишүүд ч байна гэдэг таамгийг хэвлэлүүд дэвшүүлжээ.

17.  Одоо “Олон овоот”-ын үйл ажиллагааг үргэлжлүүлж ашгаа олоход нэн түрүүнд 30 сая ам.долларын санхүүжилт хэрэгтэй байгаа аж.

18.    30 сая ам.долларын санхүүжилтийг Г.Алтан Хонгконгоос босгож магадгүй гэж хэвлэлээр бичиж байна.

19.    Тус ордын арилжааны банк болон банк санхүүгийн байгууллагуудын дундын өр, иргэн, аж ахуйн нэгж, татварын өртэйгээ нийлээд 300 тэрбум төгрөг гэж тооцож буй гэнэ.

20.    Олон овоотын ордтой холбоотой нэгэн ажлын хэсгийг УИХ-аас 2011 онд гаргаж байжээ. Зорилго нь уг ордын банкуудад учруулсан болон учруулж болзошгүй хор хөнөөлийг тодруулах байсан юм. Хамгийн сонирхолтой нь энэ ажлын хэсгийг УИХ-ын гишүүн О.Чулуунбат ахалж байв. Олон овооттой холбоотой элдэв асуудалд гүн гүнзгий холбогдсон эрхэм гишүүнээр ахлуулсан нь тухайн үедээ олон хүний сонирхол татаж байсан. Учир нь энэ ордыг гадны компанид барьцаалаад бага биш мөнгө авахад зуучилсан хүн нь О.Чулуунбат. Тэр үүнийгээ ч нууж хаагаад байдаггүй юм.

21.    Олон овоотын алтны орд нь “Олон овоот”, “Овоот 1”  гэсэн хоёр газраас бүтдэг.  “Олон Овоот”-ын  лиценз нь анх 219 А гэсэн дугаартайгаар олгогдож байжээ.

22.     2005 онд “Монгол газар”-ын Ц.Мянганбаяр “Олон овоот”-ын тусгай зөвшөөрлөө Анод банкны барьцаанд тавьсан байна.  2007 онд Анод банкны барьцаанаас чөлөөлж,  2008 оны хоёрдугаар сард “Монгол газар” компанийн эзэмшилд байсан  “Олон овоот”-ын тусгай зөвшөөрөл “Голдман сакс интернэшнл”-ийн  барьцаанд тавигджээ.

23.    2009 онд банк, банк бус санхүүгийн бүртгэл аваагүй мөртлөө барьцааны бүртгэл хийгдсэн нь Монгол Улсын хуулийг зөрчсөн байна гэдэг үндэслэлээр Ашигт малтмалын газрын Геологи, уул уурхайн кадастрын хэлтсийн  даргын 941 тоот шийдвэрээр “Голдман сакс интернэшнл”-ийн барьцааны бүртгэлийг хүчингүй болгож, барьцаанаас чөлөөлсөн байна.

24.    2009 онд  “Овоот 1”  газарт орших ашиглалтын лиценз нь анх 11201А гэсэн дугаартай байснаа 2009 онд 15274А гэсэн дугаартай болж өөрчлөгдсөн аж