Сүхбаатар дүүргийн нутаг дэвсгэрт үйл ажиллагаа явуулдаг  “Michelle” зочид буудлын дөрвөн давхраас тус буудалд менежер хийдэг эмэгтэй унаж амиа алдсан. Түүний унасан өрөө тус буудлын эзэн болох Солонгос улсын иргэний өрөө байсан юм. Иймээс  хэрэг гарсан даруйд түүнийг өөр нэг Солонгос иргэний хамт саатуулаад байсан ч хэрэг хийсэн эсэх нь тогтоогдоогүй учир батлан даалтад гаргаж авсан. Түүнчлэн Солонгос улсын хоёр иргэн тус эмэгтэйг  өрөөнд нь орж ирэнгүүтээ цонхоор үсэрсэн буюу амиа хорлосон хэмээн мэдүүлэг өгчээ. Гэхдээ талийгаач эмэгтэйн хувьд тун удахгүй Австрали улсад суралцахаар явах гэж байсан байна. Энэ нь түүнийг амиа  хорлох ямар нэгэн шалтгаан байгаагүй буюу бусдын гарт амиа алдсан гэдгийг баталж байгаа хэмээн ар гэрийнхэн нь тайлбарлажээ. Ямартаа ч зарим эх сурвалжийн мэдээлж буйгаар хэрэг гарсан өдөр дөрвөн давхраас унаж амиа алдсан хохирогч бүсгүй тухайн хоёр солонгос иргэний хамт архи ууж байсан аж. Энэ талаар цагдаагийн байгууллагын холбогдох албаны хүнээс тодруулахад "хамт архи ууж байсан байх магадлалтай" гэсэн юм. Энэ хэргийг мөрдөн байцаах ажиллагаа үргэлжилж байгаа бөгөөд ШШҮХ-нд цогцсыг шилжлүүлэхээр явуулаад байгаа юм.