Өвөр Монголын Туг сумын Далан цэцэг тосгоны иргэн 58 настай Баянбаатарыг Хятадын төмөр замын ажилчид зодож, амь насыг нь хөнөөсөн хэрэг гарчээ. Энэ үйл явдал өнгөрсөн даваа гараг буюу наймдугаар сарын 19-нд орон нутгийн цагаар 05.30 цагийн үед болжээ. Нью-Иорк хотод төвтэй Өмнөд монголчуудын хүний эрхийн мэдээллийн төв (SMHRIC)-ийн мэдээлснээр Хятадын төмөр замын ажилчид малчдын бэлчээрийг дайруулан төмөр зам тавих ажлаа эхлэх гэсэн ч малчдын эсэргүүцэлтэй тулгарсан аж. Тиймээс тэд мод, чулуугаар Баянбаатарыг цохиж амь насыг нь бүрэлгэжээ. Ноцтой нь хэргийн газар дээр Хятадын цагдаа нар ирсэн ч нөхцөл байдлыг намжаагаад Баянбаатарын аминд хүрсэн хятад ажилчдыг баривчлалгүй явуулсан байна. Харин хохирогчийн цогцсыг Уушийн хошууны эмнэлэгт хүргэж, оршуулах ёслолд бэлдэж байгаа гэж дээрх эх сурвалж мэдээллээ. Өвөр Монгол иргэд энэ хэргийг эсэргүүцэн интернет блогуудад сэтгэгдэл үлдээж байгаа ч одоогоор ямар нэгэн мэдэгдэл гаргаагүй байна.
Энэ мэт бэлчээр нутгаа хамгаалах гээд амиа алдсан Өвөр Монгол иргэдийн тоо тав боллоо. Анх 2011 онд хятад уурхайчид Зоригт, Мэргэн нарыг машинаар дайрч амь насыг нь хөнөөсөн хэрэг гарсан юм.
Сэтгэгдэл (4)