Дэлхийн алдартай эмэгтэйчүүд үргэлж олны хараанд өртөж байдаг ч тэдэнд бусдад дэлгээгүй сонирхолтой баримтууд байдаг. Yahoo.com сайт алдартай таван эмэгтэйн нууц авъяасыг өнөөдөр онцолжээ.
АНУ-ын төрийн нарийн бичгийн дарга асан Кондолиза Райсыг мэргэжлийн төгөлдөр хуурч гэдгийг олон хүн мэддэггүй. Тэрбээр 15 настайгаасаа төгөлдөр хуур тоглож эхэлсэн бөгөөд бүр Английн хатан хааны ордонд тоглож байсан гэнэ. Тэрбээр төрийн албаа өгснөөсөө хойш төгөлдөр хуур тоглох цаг зав ихтэй болсон байна.
Тэгвэл жүжигчин Сандра Буллокын нууц авъяас нь хэл сурах гэнэ. Тэрбээр хүсэх л юм бол ямар ч хэлийг сурна гэж ярьдаг байна. Сандра Буллок герман хэлээр чөлөөтэй ярьдаг чадвартай юм байна.
Жүжигчин Натали Портмэний хувьд гоо үзэсгэлэнгээсээ гадна тун ухаалаг нэгэн аж. Тэрбээр Харвардад сурч байсан бөгөөд дунд сургууль байхдаа шинжлэх ухаанд шинэ нээлт хийж, эрдэм шинэжилгээний өгүүллээ сэтгүүлд хэвлүүлж байжээ.
Харин нэгэнтээ АНУ-ын тэргүүн хатагтай байсан Хиллари Клинтон үгийн сүлжээ таах хоббитой аж. Тэрбээр сонгуулийн сурталчилгааны үеэр энэ нууцаа дэлгэсэн бөгөөд тархиа амраах нэг арга нь болдог байна. 
Жүжигчин Жэмми Ли Куртис харин чадварлаг зохион бүтээгч гэнэ. Тэрбээр хамгийн сүүлд ээжүүд, нярай хүүхдүүдэд зориулан шинэ өлгий зохион бүтээсэн байна. Энэ нь живх хийх шаардлаггүйгээр шингэнийг гадагшлуулж, хадгалж чаддаг өлгий аж. Гэхдээ хараахан хэрэглээнд нэвтэрч амжаагүй байна.
