Хотын дарга Э.Бат-Үүлийн замын түгжирлийг бууруулахын тулд машиныг дугаараар нь хязгаарлах санаачилга тун дажгүй эд байлаа. Даан ч баячууд энэ санаачилгыг юу ч биш болгож эхэллээ. Учир нь Улаанбаатарын боломжийн амьдралтай айлууд дугаарын хязгаарлалтаас болоод хоёроос гурван машинтай болж эхэлсэн байна. Өмнө ч боломжийн амьдралтай иргэд хот, хөдөөд унадаг машинтай байсан л даа. Харин ийм айл өрхийн тоо улам л нэмэгдэх боллоо. Ингээд нэмэгдээд байвал машины дугаарын хязгаарлалтын үр дүн, ач холбогдол алга болох нь.

Тэр ч бүү хэл сүүлийн үед зарим шинэ хөрөнгөтнүүд олон машинтайгаа цахим ертөнцөөр гайхуулав болов. Тэгээд “бидний амьдралд дугаарын хязгаарлалт нөлөөлдөггүй”, “өнөөдөр тэгшээр эхэлсэн машин явахгүй бил үү? тэгвэл сондгой дугаартайгаа унахаас” гэж ирээд л баярхах юм. Нэг хэсэг жирийн иргэд нь төр засгийнхаа шийдвэрийг дагаад хэрэгжүүлээд байхад нөгөө хэсэг нь амьдралын давуу талаа ашиглан юу ч биш болгох нь шударга биш байна.

Тиймээс энэ асуудлыг яаж шийдэх ёстой вэ? Юуны өмнө Улаанбаатарын нэг иргэн хэдэн машинтай байгааг судалгаагаар гаргах хэрэгтэй. Бас нэг гэр бүл хэдэн машинтайг ч нарийвчлан тодорхойлж болно. Тэгээд нэгээс дээш машинтай иргэдээс өндөр татвар авдаг болох хэрэгтэй.  Мэдээж боломжийн амьдралтай иргэд өндөр татвараа төлөөд хэрэглээгээ л эдлэнэ биз. Гол нь төсвөө нэмэгдүүлэх ийм алхам хийх цаг боллоо. Хэрэв энэ чигээрээ байгаад байвал олон машинтай болох айл өрх, иргэдийн тоо улам л нэмэгдэнэ. Энэ нь эргээд засаг төрийн шийдвэрийг үр дүн багатай болгож байна.

Үүнээс гадна Улаанбаатарын зарим иргэд арав гаруй орон сууцтай байдаг гэсэн судалгаа бий. Гэтэл зарим иргэд нь нэг өрөө байртай болох гэж найман хувийн зээл хөөцөлдөж байна. Нөгөө хэсэг нь хэзээ ч авч чадахгүй байна. Тиймээс олон орон сууцтай иргэдээс өндөр татвар авдаг эрх зүйн шинэ зохицуулалт бас хэрэгтэй болов. Бусад орнуудад ийм жишиг бий л дээ. Иргэдийн орон сууцны хүртээмжийг бий болгохын тулд нэг иргэн олон сууцтай бол илүү өндөр татвар төлдөг. Мэдээж жил бүр өндөр татвар төлөөд байх нь ашиггүй болдог учир орон сууцнаасаа зарж эхэлдэг. Энэ нь нөгөө нэгэнд боломж олгодог.

Орон сууц, автомашин хоёрын ийм татварыг Улаанбаатарт хэрэгжүүлбэл замын бөглөрөл, иргэдийн орон сууцны хүртээмж хоёрт онцгой нөлөөлөл үзүүлэх боломж харагдаж байна.