Томчуудын тоомжиргүй, буруутай байдлаас болж бага насны хүүхдүүд нэгнээ хөнөөсөн эмгэнэлт хэрэг дахин давтагдан гарсаар байна. Томоогүй гэнэн хүүхдүүд аливаа юмыг сониучирхах нь байх л зүйл. Гэхдээ эцэг эхчүүдийн буруутай үйлдэл, хайхрамжгүй байдлаас болж бяцхан үрсийн амь нас эрсдсээр байгааг хатуу шүүмжлэх нь зүйтэй юм болов уу?.  

Өмнө нь Сэлэнгэ аймгийн Мандал сумын малчин Х-ын 10-12 насны хоёр хүүхэд гэрийн хананд өлгөсөн буугаар тоглож байгаад гох дарагдаж, нэгнээ буудсан хэрэг гарч байсан. Хэргийг сөхвөл, малчин Х-гийн гэрт хэрэг гарах өдөр  байгаль хамгаалагч ажилтай Н ирсэн байсан бөгөөд сумласан буугаа хананд нь өлгөчихөөд гараад явсан байж. Энэ хойгуур нь эгч дүү хоёр сониуч зандаа хөтлөгдөн буунд гар хүрснээр гох нь дарагдаж, нэгнийхээ аминд хүрсэн байдаг.

Тэгвэл энэ сарын 18-ны өдөр Хэнтий аймгийн төвд хөрш айлын зургаан настай хоёр хүү гэртээ хадгалж байсан буугаар тоглосны улмаас сум алдаж нэгнийхээ аминд хүрсэн хэрэг гарсан юм.  Энэ хэргийн тухайд,  гэрийн эзэд нь орон доогуураа буу даавуунд боогоод хийчихсэн байсныг хүүхдүүд  олж, тоглож байгаад нэгнээ хөнөөсөн байгаа юм.

Хүүхэд л болсон хойно бууг сониучирхаж, нэгнийгээ буудлаа шүү гэж тоглож байсан нь гарцаагүй. Улмаар цэнэглэгдсэн буу зургаахан настай хүүхдийн аминд хүрсэн. 

Ер нь насанд хүрээгүй хүүхэд гэмт хэрэгт холбогдсон хохирсон тохиолдол цөөнгүй гардаг. Гэхдээ  томчуудын хайхрамжгүй байдлаас болж ийн хэрэг гараад байгаа нь үнэхээр харамсалтай юм. Эцэг эхийн хариуцлагагүй  байдлаас үүдэн хүүхдүүд нэгнийгээ буудаж хөнөөлөө мөн  тоглоомон сумаар нэгнийгээ буудаж гэмтээсэн хэрэг ч хөдөө орон нутгаар шил шилээ даран гардаг байна.

Энэ бүх тохиолдлоос харахад гэнэн томоогүй хүүхдүүддээ эцэг эхчүүд хараа хяналт сул тавьж, болохгүй зүйлийн талаар анхааруулж хэлж захихгүй байгаагаас үүдэж хүүхдүүд гэмт хэргийн золиос болсоор байгаа юм.

Мөн ганц хүүхэд гэлтгүй насанд хүрсэн хүмүүс нэгнээ буудаж хөнөөсөн жигшүүрт хэрэг гарсаар байгаа. Тухайлбал, тарваганд явсан залуус хоорондоо маргалдаж нэг нь хоёр найзыгаа буудаж хөнөөгөөд, өөрийнхөө ч амийг егүүтгэсэн хэргийг та бүхэн санаж байгаа байх аа.

Хоёр дахь жишээг дурдахад, Чингэлтэй дүүргийн дөрөвдүгээр хорооны 20 дугаар байранд амьдардаг Батчулуун гэгч хөршийнхөө эхнэрийн нүдийг зад буудаж гэмтээсэн байдаг.  Энэ хэргийн тухайд  хөрш айлын хүүхдүүд шуугилдсанаас болж хөршийнхөө нүд рүү буудаж байсан юм.

2011 оны  байдлаар  нийслэлийн хэмжээнд л гэхэд 9061 ширхэг буу улсын санд буртгэлтэй байсан. Тэгвэл энэ онд үүнээс ч олон  болсон биз. Мэдээж галт зэвсгийг эрх зүйн чадамжтай насанд хүрсэн иргэн эзэмших эрхтэй.  Харин тэд эзэмшихдээ  аюулгүй байдлын үүднээс бууг цэнэглэлгүй, зориулалтын гэрэнд хийсэн байх ёстой байдаг.

Түүнчлэн манай улсад галт зэвсгийн худалдааг албан ёсны зөвшөөрөлтэй импортолдог "Их ав" гэж нэг л төв үйл ажиллагаа явуулдаг аж.  Эндээс ангийн зориулалттай буу болон сум худалдан авахыг зөвшөөрдөг. Тэгэхээр энэ газар бас анхааруулга, сэрэмжлүүлгийг цаг ямагт өгч байх хэрэгтэй байгаа юм.