“Ноёд” группийн захирал Г.Буяндоржийг хуулийнхан өнгөрсөн долоо хоногт баривчилсан тухай мэдээ хэвлэлээр хэсэг шуугисан. Мөн түүнийг эхнэр Т.Ариунаагийнхаа хамтаар гэртээ бүгж байгаад баригдан өдгөө ШШГЕГ-ын харъяа 461 дүгээр ангид хоригдож байгаа талаарх ч мэдээлэл тараад байсан.

Харин “Ноёд” группийн захирал Г.Буяндоржийг баривчилсан талаар эхнэр болох МУГЖ, дуучин Т.Ариунаа эрс үгүйсгэж мэдэгдэл хийлээ.

Тэрээр ярихдаа “ Манай нөхрийг бусадтай бүлэглэн их хэмжээний мөнгө угаасан хэрэгт сэжиглэгдэн, байцаагдаж байх явцдаа оргон зайлсан хэргээр эрэн сурвалжлагдсан гэх утгатай төлбөртэй мэдээлэл сар гаруй  хэвлэлээр бичигдлээ. Манай нөхрийг цагдаа нар бариагүй. Бид хүүхдүүдтэйгээ цуг байгаа.

Энэ бүхэн манай нөхрийн компанид ажиллаж байсан С.Билэгт гэдэг эмэгтэйн хийж байгаа явуулга. Түүний зорилго бол бидний хөрөнгө мөнгийг булаах явдал. С.Билэгт бидний хоорондын маргааныг Улсын Ерөнхий прокурор дээр хянаж байгаа. Манай нөхөр байцаалтаас зугтаагүй. С.Билэгт нь “Ноёд констракшн”-ны гүйцэтгэх захирлаар ажиллаж байхдаа их хэмжээний мөнгө шамшигдуулсан, залилангийн хэргээр нэг бус удаа шүүхээр шийтгүүлсэн. Иргэдээс болон “Ноёд констракшн”-наас их хэмжээний мөнгө, хөрөнгийг залилан авсныг тогтоогоод хууль хяналтын байгууллагад эрүүгийн хэрэг үүсгэн шалгаж байгаа юм байна лээ. Тэр эмэгтэй манай компанийн барьсан 808 айлын орон сууцыг булаачихаад байна. Бидний хөрөнгийг булаахын тулд хэвлэл мэдээлэл, хууль хяналтын байгууллагыг ашиглан дарамтлах гэж улайрч байна.

Манай нөхөр нутагтаа Г.Эрхэмбаяр аваргад хүндэтгэл үзүүлэх наадам, Бумбаны тахилгад оролцоод явж байсан. Гэтэл олны дунд ажлаа хийгээд явж байсан хүнийг баривчлагдсан гэх мэдээллийг гаргаж байсан байна. Дарханы төмөрлөгийн үйлдвэрийг барьцаанд тавьсан, мөнгө угаасан зүйл байхгүй.

Хууль хяналтынхан үнэн зөвийг тогтоочих хэрэгтэй байна. Тэр үед Г.Буяндорж хэвлэлийнхэнд хандаж мэдээлэл хийх болно" гэлээ. Мөн Г.Буяндоржийг УМБГ-аас баривчлаагүй. Харин УП-ын дэргэдэх мөрдөн байцаах газраас эрэн сурвалжилж байгаа аж.