Арван таван мянган лангуу түрээслэгчдийг тэжээдэг Нарантуул захад өнөөдөр 06.10 цагийн орчимд гал гарлаа. Онцгой байдлын албаныхан, Гал командынхан хүч нэмэгдүүлэн ажилласан ч хүнсний зах нь тэр чигээрээ шатлаа. Дотор нь цайны газрууд байдаг тул хийн баллонууд нь дэлбэрч галыг унтраахад хүндрэл учруулсан байна.

    Зөвхөн хүнсний захад гэхэд 100 гаруй худалдаачин лангуу түрээсэлдэг байжээ. Галын шалтгааныг албаны хүмүүс одоогоор тогтоогоогүй байгаа ч захын худалдаачид гадны нөлөөтэй хэмээн хардаж байна. Энэ долоо хоногт Нарантуул захыг хоёр хоног хааж, зам тавих гэснээс үүдэн маргаан гараад байсан юм. Худалдаачид хичээлийн шинэ жил эхэлж, наймааны сезоны үе ирж байхад захыг хаах гэлээ хэмээн эсэргүүцэн "Нарантуул" зах дотор ээлжээрээ гурав, дөрөв хонолоо. Нарантуул зах дотор нийтийн тээвэр явах боломжтой зам тавих гэж байгаа нь сайн ч төв замаасаа Нарантуул зах хүртэлх замаа засаагүй байж шууд захыг хаах гэж байгаа нь хэн нэгний явуулга гэж үзэж байгаа юм. Тодруулбал энэ захаас бараагаа авч сурсан иргэд шинээр ашиглалтанд орсон "Дүнжингарав" худалдааны зах руу орж үйлчлүүлэхгүй байгаагаас "Нарантуул"-ын наймааг түр хугацаагаар зогсоож, "Дүнжингарав"-ын орлогыг нэмэгдүүлэх гэсэн санаа хэмээн хардаж байна. Нарантуул захад наймаа эрхэлдэг З.Ариунболд "Хэрэв зөвхөн зам тавихын тулд захыг хаах байсан юм бол наадмын өдрүүдэд амарч байхад хаахгүй яасан юм бэ? Яг сезоны үеэр чухал шаардлагагүйгээр захыг хаах гэж оролдож байгаа нь буруу. Хэрэв ХСҮТ-өөс засмал замаа татаад ирвэл бид үг дуугүй зам тавих газрыг чөлөөлж өгнө. Гэтэл зах руу ирэх зам нь байхгүй хэрнээ "Нарантуул"-ыг хаана, зогсооно гэж байгаа нь цаанаа учиртай" хэмээн бухимдлаа.
    Өнөөдөр гарсан гал ч "Нарантуул"-ын үйл ажиллагааг зогсоох гэсэн хэн нэгний явуулга хэмээн наймаачид хардсаар байна.